Almaty oblysynyń ákimi Marat Sultanǵazıev Almaty qalasyndaǵy №1 balalar úıiniń tárbıelenýshilerimen kezdesti,- dep habarlaıdy Dalanews.kz 

Qalada bilim alyp júrgen tárbıelenýshiler ózderine úırenshikti ortada oqýyn jalǵastyrady, al jańadan qabyldanatyn balalar Qonaev qalasyna ornalastyrylady.

Jaǵdaıdy jan-jaqty zertteý maqsatynda oblys ákimi balalar úıiniń ókilderimen, onyń ishinde dırektor Roza Bekisheva, pedagogtar jáne tárbıelenýshilermen kezdesý ótkizdi. Talqylaýǵa Balalar quqyqtary jónindegi ýákil Dınara Zakıeva, oblystyq bilim basqarmasynyń basshysy Saltanat Bespaeva, Qonaev qalasynyń ákimi jáne tıisti vedomstvo ókilderi qatysty.

Buǵan deıin bilim basqarmasynyń basshysy Saltanat Dáýisbekqyzy mekemege baryp, ondaǵy jaǵdaımen tanysyp, qyzmetkerlerdiń kóshý jáne jumys oryndaryn saqtaý máseleleri boıynsha pikirlerin tyńdaǵan bolatyn.

«Balalar Almatyda qalǵysy keletinderin aıtty, óıtkeni jańa ortaǵa beıimdelý jáne áleýmettik ortadan ajyraý olardyń psıhologıalyq jaǵdaıyna keri áser etýi múmkin. Bul faktor sheshim qabyldaýda basty nazarǵa alyndy», - dep atap ótti óńir basshysy Marat Sultanǵazıev.

Sonymen qatar, oblysta jańa balalar úıiniń qurylysy jalǵasýda. Jalpy aýdany 4000 sharshy metrdi quraıtyn zamanaýı ǵımarat 240 orynǵa eseptelgen. Onda jaıly turǵyn bólmeler, oqý synyptary jáne demalys aımaqtary qarastyrylǵan.

Jaqyn mańda 900 oryndyq mektep ornalasqan, al balalardy tasymaldaý úshin arnaıy avtobýs bólinedi. Keshenniń ashylýy jaz aılaryna josparlanǵan.

Budan bólek, jańa ǵımarattyń bir bóligi ınfraqurylymdyq máselelerge tap bolǵan Núsipbaev atyndaǵy ınternatqa beriledi. Sondaı-aq, ǵımarattyń bir korpýsy Kámeletke tolmaǵandardy beıimdeý ortalyǵynyń (KTBO) qajettilikterine jumsalady, bul oblystyń ártúrli aımaqtarynan kelgen balalardy basqa qalalarǵa aýystyrmaı, bir jerde ornalastyrýǵa múmkindik beredi.

Bılik ókilderi jetim balalarǵa qatysty barlyq sheshimder olardyń múddesin, ómir súrý jaǵdaıynyń jaılylyǵyn jáne sapaly bilim alýyn basty orynǵa qoıa otyryp qabyldanatynyn erekshe atap ótti.

«Bizdiń maqsatymyz – balalar ózin qaýipsiz sezinip, jan-jaqty damýy úshin qolaıly orta qalyptastyrý. №1 balalar úıiniń tárbıelenýshileri Almatyda qalady, al jańadan keletin balalar Qonaev qalasyndaǵy zamanaýı keshenge ornalastyrylady»,- dep túıindedi Marat Sultanǵazıev.

Kezdesý aıasynda balalar úıiniń tárbıelenýshileri bilim berý ortalyǵy, týrısik-sporttyq keshen jáne ınovasıalyq habqa bardy. Bul baǵdarlama olardyń bolashaq múmkindikterimen jáne damý perspektıvalarymen tanystyrdy.

«Qurylys nysanyn aralap, bolashaq balalar úıiniń pasportyn tanystyrǵannan keıin, biz úshin óte jaqsy jaǵdaı jasalyp jatqanyn jáne mańynda eshqandaı túrme joq ekenin kórdik»,- dep bólisti balalar úıiniń tárbıelenýshisi Kırıl Kapranov.