Almaty oblysynda Qazaqstan Respýblikasynyń jańa Konstitýtsiiasynyń jobasyn talqylaýǵa arnalǵan oblys aktiviniń otyrysy ótti. Oblys ákimi Marat Sultanǵaziev tóraǵalyq etken jiynǵa oblystyq máslihat tóraǵasy, oblys ákiminiń orynbasarlary, aýdan jáne qala ákimderi, departamentter men basqarmalardyń basshylary, quqyq qorǵaý organdarynyń ókilderi, iri kásiporyn jetekshileri men jergilikti buqaralyq aqparat quraldarynyń ókilderi qatysty, dep habarlaidy Dalanews.kz.
Óńir aktivi jańa Ata zań qabyldanǵan jaǵdaida biliktiń halyq aldyndaǵy jaýapkershiligi kúsheiip, eldiń saiasi júiesi tolyq jańaratynyn atap ótti.
«Konstitýtsiialyq reforma aiasyndaǵy ózgerister qoǵam men zaman talabyna sai saiasi júieni jańartýǵa baǵyttalǵan: memlekettik basqarý ashyq bola túsedi, sheshim qabyldaý sapasy artady, azamattardyń memleketke degen senimi nyǵaiady. Sonymen qatar ádilettilik, zań ústemdigi, birlik pen kelisim, egemendik pen aýmaqtyq tutastyq, tabiǵatqa jaýapkershilikpen qaraý qaǵidattary konstitýtsiialyq deńgeide bekitiledi. Eń bastysy – bul ózgeristerdi halyqtyń ózi qabyldaidy. Konstitýtsiianyń jańa redaktsiiasy jalpyhalyqtyq referendým arqyly bekitilip, árbir azamatqa sanaly tańdaý jasaýǵa múmkindik beriledi», – dedi oblys ákimi Marat Sultanǵaziev.
Jańa joba aiasyndaǵy negizgi jańalyqtardyń biri – 145 depýtattan turatyn bir palataly Parlament, iaǵni Quryltai institýtyn engizý. Sondai-aq memlekettik basqarý júiesine vitse-prezident institýtyn engizý usynylyp otyr.
Taraptar Konstitýtsiialyq reforma aiasynda usynylǵan ózgeristerdi halyqpen kezdesýlerde jáne qoǵamdyq alańdarda qarapaiym ári túsinikti tilmen jetkizýdiń mańyzdylyǵyna nazar aýdardy. Sonymen qatar oblys ákimi Konstitýtsiialyq reforma jónindegi komissiia quramyna Almaty oblysynan oblystyq máslihat tóraǵasy Qýat Baiǵojaev múshe ekenin erekshe atap ótti.
