Bul sapardyń basty maqsaty - Qazaqstan Respýblikasy Prezidenti Nursultan Ábishuly Nazarbaevtyń ótken jyly Polsha Respýblikasyna jasaǵan saparyndaǵy kelisimderge orai elaralyq yntymaqtastyqty damytý. Osy sapar barysynda óńiraralyq áriptestik bailanystardy odan ári nyǵaitý týraly kelisimder jasaldy.
Delegatsiia músheleri Liýblin voevodtyǵynyń marshalegi (basshysy) Slavomir Sosnovskiimen kezdesip, Liýblindegi aýrýhanada, balalar emhanasynda, Ekonomika jáne innovatsiia Joǵarǵy mektebinde, Biala-Podliaska qalasyndaǵy meditsinalyq ortalyqta boldy.
Baǵdarlama barysyndaǵy sharalar nátijesinde eki tarap Qazaqstannyń 35 stýdentin orta býyndy meditsina qyzmetkerlerin eýropalyq baǵdarlamamen daiyndaý maqsatynda 3,5 jyl Liýblin jáne Biala-Podliaska qalalaryndaǵy poliak ýniversitetterinde oqytý jóninde sheshimge keldi. Sonymen qatar ekonomika, menedjment jáne informatika boiynsha 30 mamandy oqytý týraly da kelisildi.
Qazaqstandyqtardyń oqýy men Polshada turý shyǵyndarynyń barlyǵyn poliak jaǵy kóteretin bolady.
Liýblin voevodtyǵynyń marshalegi bastaǵan poliak kásipkerleriniń bir toby biylǵy jyldyń qyrkúiek aiynyń basynda Astanaǵa EKSPO-2017 kórmesine kelýdi josparlap otyr. Óz kezeginde qazaqstandyq delegatsiianyń jetekshisi uzaq merzimdi óńiraralyq yntymaqtastyqty ornyqtyrý maqsatynda poliak ókilderin Almaty oblysyna saparlap kelýge shaqyrdy.
Sondai-aq 2017 jylǵy 25 shildede Varshavada Qazaqstannyń Polshadaǵy Tótenshe jáne Ókiletti elshisi Marǵulan Baimuhan men Almaty oblysy ákiminiń orynbasary Jaqsylyq Omardyń Polsha damý vitse-ministri ári Qazaqstan-Polsha ekonomikalyq yntymaqtastyǵy jónindegi úkimetaralyq komissiianyń teń tóraǵasy Tadeýsh Kostsinskiimen kezdesýi ótti. Kezdesýde qos tarap ózara qarym-qatynastyń óńiraralyq deńgeii jónindegi máselelerdi talqylady.
