بۇل ساپاردىڭ باستى ماقساتى - قازاقستان رەسپۋبليكاسى پرەزيدەنتى نۇرسۇلتان ءابىش ۇلى نازاربايەۆتىڭ وتكەن جىلى پولشا رەسپۋبليكاسىنا جاساعان ساپارىنداعى كەلىسىمدەرگە وراي ەلارالىق ىنتىماقتاستىقتى دامىتۋ. وسى ساپار بارىسىندا ءوڭىرارالىق ارىپتەستىك بايلانىستاردى ودان ءارى نىعايتۋ تۋرالى كەلىسىمدەر جاسالدى.
دەلەگاسيا مۇشەلەرى ليۋبلين ۆويەۆودتىعىنىڭ مارشالەگى (باسشىسى) سلاۆومير سوسنوۆسكييمەن كەزدەسىپ، ليۋبليندەگى اۋرۋحانادا، بالالار ەمحاناسىندا، ەكونوميكا جانە يننوۆاسيا جوعارعى مەكتەبىندە، بيالا-پودلياسكا قالاسىنداعى مەديسينالىق ورتالىقتا بولدى.
باعدارلاما بارىسىنداعى شارالار ناتيجەسىندە ەكى تاراپ قازاقستاننىڭ 35 ستۋدەنتىن ورتا بۋىندى مەديسينا قىزمەتكەرلەرىن ەۋروپالىق باعدارلامامەن دايىنداۋ ماقساتىندا 3،5 جىل ليۋبلين جانە بيالا-پودلياسكا قالالارىنداعى پولياك ۋنيۆەرسيتەتتەرىندە وقىتۋ جونىندە شەشىمگە كەلدى. سونىمەن قاتار ەكونوميكا، مەنەدجمەنت جانە ينفورماتيكا بويىنشا 30 ماماندى وقىتۋ تۋرالى دا كەلىسىلدى.
قازاقستاندىقتاردىڭ وقۋى مەن پولشادا تۇرۋ شىعىندارىنىڭ بارلىعىن پولياك جاعى كوتەرەتىن بولادى.
ليۋبلين ۆويەۆودتىعىنىڭ مارشالەگى باستاعان پولياك كاسىپكەرلەرىنىڭ ءبىر توبى بيىلعى جىلدىڭ قىركۇيەك ايىنىڭ باسىندا استاناعا ەكسپو-2017 كورمەسىنە كەلۋدى جوسپارلاپ وتىر. ءوز كەزەگىندە قازاقستاندىق دەلەگاسيانىڭ جەتەكشىسى ۇزاق مەرزىمدى ءوڭىرارالىق ىنتىماقتاستىقتى ورنىقتىرۋ ماقساتىندا پولياك وكىلدەرىن الماتى وبلىسىنا ساپارلاپ كەلۋگە شاقىردى.
سونداي-اق 2017 جىلعى 25 شىلدەدە ۆارشاۆادا قازاقستاننىڭ پولشاداعى توتەنشە جانە وكىلەتتى ەلشىسى مارعۇلان بايمۇحان مەن الماتى وبلىسى اكىمىنىڭ ورىنباسارى جاقسىلىق وماردىڭ پولشا دامۋ ۆيسە-مينيسترى ءارى قازاقستان-پولشا ەكونوميكالىق ىنتىماقتاستىعى جونىندەگى ۇكىمەتارالىق كوميسسيانىڭ تەڭ ءتوراعاسى تادەۋش كوسينسكييمەن كەزدەسۋى ءوتتى. كەزدەسۋدە قوس تاراپ ءوزارا قارىم-قاتىناستىڭ ءوڭىرارالىق دەڭگەيى جونىندەگى ماسەلەلەردى تالقىلادى.
