Bul respýblika deńgeiinde balamasy joq, atalǵan baǵyttaǵy biregei joba.
Uiǵyr aýdanynda volonterlerge memqyzmetti onlain alýdyń qyr-syryn úiretetin seminar ótti. Sharaǵa Almaty oblysy ákiminiń orynbasary Rýstam Ali, Memlekettik qyzmet isteri agenttigi Almaty oblysy boiynsha departament basshysy Lázzat Beisequlova jáne aýdan ákimi Shýhrat Nýrahýnov qatysty.
Búginde qyzmet kórsetýdiń 80 paiyzy elektrondy túrge kóshken. Karantin kóptegen azamattarǵa óz máselesin qashyqtan sheshýdi úiretip, onlain qyzmet mańyzyn arttyra tústi.
Alaida memlekettik kómekti onlain alýdy áli de bolsa tolyq meńgermegen azamattar bar. Osy sebepti volonterler olarǵa memqyzmetti internet arqyly alý joldaryn úiretip, turǵyndarmen tikelei jumys isteitin bolady.
Qazirgi tańda memqyzmettiń 465 túri onlainǵa kóshken. Óńirdiń 17 aýdan jáne 3 qalasynan kelgen eriktiler oqytý lagerine jazylyp, biliktiligin arttyrýda.
Lázzat Beisequlovanyń atap ótkenindei Egov portaly, telegram bottar, virtýaldy keńesshilerdiń arqasynda Halyqqa qyzmet kórsetý ortalyǵyna baratyn azamattardyń sany azaiǵan.
"Memqyzmetti alý joly jeńildedi. Alaida munyń igiligin kóre almai otyrǵan turǵyndarymyz bar. Ásirese aýyldyq jerde turatyn azamattardyń onlain qyzmetke qoly jete bermeidi. Aǵa-apalarymyz Egov portalyn paidalana bilmeidi. Erikti jastar osy olqylyqtyń ornyn toltyryp, aǵa býyndy internet múmkindigin paidalanýǵa úiretýi tiis. Tsiflandyrý aiasynda memqyzmetti 100 paiyzǵa paidalaný qajet. Al buǵan volonterler kómektesedi", – deidi Lázzat Beisequlova.
Artynsha department basshysy osy bastamaǵa atsalysyp jatqan eriktilerdi marapattady.
Eki kúni boiy Memlekettik qyzmet isteri agenttigi Almaty oblystyq departamenti memlekettik qyzmet basqarmasynyń mamandary, Taldyqorǵandaǵy halyqqa qyzmet kórsetý ortalyǵynyń sýpervaizeri Maqsat Smaǵulov jáne "Ulttyq eriktiler jelisiniń" jattyqtyrýshysy Dastan Aqqoja eriktilerdi Egov.kz portalynyń qyr-syrymen tanystyryp, dáris ótkizedi.
