Almaty oblysynyń ákimi kóktemgi sý tasqyny men kóshkin qaýpi joǵary aimaqtarǵa jumys saparymen baryp, jaǵdaidy kózben kórip, baqylaý júrgizdi. Inspektsiia barysynda ol birqatar mańyzdy nysandardy aralap, jaýapty tulǵalardyń esepterin tyńdady, - dep habarlaidy Dalanews.kz.
Eń aldymen, Ile aýdanyndaǵy Jarmuhanbet ózeni boiyndaǵy sý basý qaýpi bar aýmaqqa bardy. Munda Ile, Qarasai jáne Jambyl aýdandarynyń ákimderine sý tasqynynyń aldyn alý sharalaryn kúsheitip, injenerlik qurylystardyń daiyndyǵyn qamtamasyz etý tapsyryldy.
Odan keiin Talǵar, Esik jáne Túrgen ózenderi basseinderindegi morenalyq kólderge áýe sholý jasaldy. Ásirese, qaýipsizdik sharalaryn kúsheitý men jańa bógetter salý qajettiligi bar aimaqtarǵa erekshe nazar aýdaryldy.
«Halyqtyń qaýipsizdigi – basty mindet. Tabiǵi qaýip-qaterlerge jedel áreket etip, yqtimal táýekelderdi barynsha azaitýymyz qajet», – dep atap ótti oblys ákimi.
Óńirdiń tótenshe jaǵdailar departamenti sý tasqyny men kóshkinniń aldyn alý jáne saldaryn joiý boiynsha keshendi sharalardy júzege asyrýda. Qorǵanys qurylystary kúsheitilip, morenalyq kólder baqylaýǵa alynǵan. Barlyq shuǵyl qyzmetter joǵary daiyndyq rejimine kóshirildi. Jyl basynan beri 23,5 km ózen arnalary túzetilip, bekitildi, 16 tonna qaldyq shyǵaryldy, 5 qorǵanys bógeti (7,9 km) salyndy. Tasqyndarǵa jedel áreket etý úshin 1326 maman, 471 tehnika, 126 motopompa jáne 29 qaiyq jumyldyryldy. Qajetti materialdyq qorlar daiyndalǵan. Sý basý qaýpi joǵary 20 ýchaskeniń 7-eýi tolyq qaýipsizdendirilip, qalǵan 13-inde aldyn alý jumystary júrgizilýde.
