Al, Jetisý óńiri atalǵan olqylyqtyń ornyn toltyrdy. Ol jylsaiyn ótetin Almaty oblysy ákiminiń júldesi úshin jýrnalistter arasyndaǵy «Samǵaý» baiqaýy.
Tulpardyń tuiaqtysy ǵana shydaityn alaman báigeni uiymdastyrýshylar Almaty oblystyq ishki saiasat basqarmasy.
Jetisýdyń jaýharlaryn tizip, jetistigin jazyp, sara jolyn saralaityn surmergender aqparat taratýdan artta qalǵan emes. Óńirlik BAQ ókilderi qashanda aqparat maidanynyń alǵy shebinde. Olar Jetisý ólkesiniń jemisi men jeńisin buqaraǵa jetkizip, qoǵamdaǵy kemshil tusty dóp basyp aityp júr. Oblys ákiminiń qoldaýymen ótken árbir jańa bastama qashanda baspasóz betinde. Bul da jýrnalisterdiń tabandy eńbeginiń kórinisi.
Biyl Almaty oblysynda «Jumyspen qamtýdyń jol kartasy-2020» baǵdarlamasy bastaý alǵan bolatyn. Onyń iske asýy barsha jurttyń nazarynda boldy.
Osy rette atalǵan jumystardy nasihattaýǵa úles qosqan qalamdy jaýyngerlerdiń qaltqysyz qyzmetin moiyndamasqa bolmas. Sonymen qatar, Kóksý, Aqsý qant zaýyttarynyń jańa maýsymǵa daiyndyǵy da kógildir ekranda kórsetildi. Aýa-raiynyń qolaisyzdyǵyna, taǵdyrdyń tosyn syiyna qaramastan ólkeniń órkendeýi jolynda atqarǵan jumystary eleýsiz qalmaidy. Barlyǵy el esinde.
Sondai-aq, shalǵaidaǵy eldi mekenderge baryp, aqjoltai habardy buqaraǵa birinshi jetkizýge tyrysty. Oǵan dálel, oblys aýmaǵynda ashylǵan túrli mańyzy bar áleýmettik nysandardy qoldanysqa bergende tańmen talasa aqpar taratqandyǵy.
Olardyń mundai eseli eńbekterin aimaq basshysynyń orynbasary Rýstam Áli de baǵalap otyr.
«Byltyrǵy jyldan bastap el prezidenti Qasym-Jomart Toqaevtyń tapsyrmasy boiynsha kásibi mereke – Qazaqstan Jýrnalister kúni resmi túrde bekitildi. Jalpy, ótken jylmen salystyrǵanda oblystyq BAQ-tardy qarjylandyrý 25% - ǵa artty, Jýrnalister úiin materialdyq-tehnikalyq qamtamasyz etý aitarlyqtai jaqsardy.
Biylǵy jyly jýrnalister epidemiologiialyq jaǵdaidy ǵana emes, sondai-aq aýyl sharýashylyǵy, áleýmettik mańyzdy nysandardyń ashylýy: juqpaly aýrýlar aýrýhanasy, mektepter, ambýlatoriialar, dene shynyqtyrý-saýyqtyrý keshenderi, stýdentterge arnalǵan jataqhanalar, turǵyn úiler siiaqty mańyzdy aspektilerdi belsendi túrde jariia etti. Mysaly, Olar Raiymbek aýdanynda nysandardyń, óńirdiń barlyq aýdandary men qalalarynda servistik ákimdikterdiń ashylýyn keńinen jariia etti.
Búginde oblystyq "Jetisý" telearnasy tsifrlyq formatta 87 habar taratý stantsiiasy arqyly oblystyń barlyq eldi mekenderin 100% - ǵa qamtidy. Zamanaýi stýdiialar jabdyqtalǵan jáne iske qosylǵan, olardyń eń úlkeni 600 sharshy metr. Oblys ákimdiginiń qatysýymen oblystyq jáne respýblikalyq BAQ jýrnalisteri úshin Germaniia, Singapýr, Latviia, Grýziia, Ýkraina, Tatarstanǵa blog-týrlar uiymdastyryldy, bul túrli elderdiń BAQ ókilderi arasyndaǵy ekijaqty bailanystardyń damýyna yqpal etti",– dedi Rýstam Áli.
Tushymdy oiy, paiymdy kózqarasy bar tilshi qaýymnyń tirshiligi eldiń aldynda ótip jatyr. Halyq qalaýlylaryna ainalǵan saiypqyrandardyń «Samǵaýy» zańdylyq.
Ádettegidei, dástúrden jańylmai ótken baiqaýǵa joǵaryda syipattaǵan, sózden sulý sarai soǵyp, halyqtyń óz bidaiyn ózderine qýyryp berip júrgen jandar dodaǵa tústi. Daryndylar top jardy. Tilshilik tirshilikpen tynystap júrgender 11 atalym boiynsha baǵyn synady. Barlyǵy 118 ótinish kelip túsken.
Saiys qorytyndysy boiynsha úzdikter laiyqty tuǵyryna qondy.
Jiktep aitar bolsaq, «Úzdik jelilik basylym» nominatsiiasy boiynsha 1-oryndy «Qarasayinfo» jelilik basylymy aldy. Al, «Úzdik oblystyq Vlog (Almaty oblysy boiynsha beine-blog) nemese (Úzdik bloger») (Almaty oblysy týraly post) atalymynan Muhit Toqtasyn júldeli birinshi orynǵa ie boldy.
«Úzdik beine klip óndeýshi» dep qazylar alqasy «Jetisý» arnasynyń rejissery Erlan Ushaqpaevti tanyǵan. Júldeli orynnan kórinýshilerdiń qatarynda «Jetisý» gazetiniń dizaineri Móldir Muratalina da bar. Ol «Baspa basylymnyń úzdik dizainy, infografika» atalymy boiynsha laiyqty tuǵyryna shyqty. «Úzdik tilshi» (aýdan, qalalyq baspa basylymdary) nominatsiiasy boiynsha «Kerbulaq juldyzy» gazetiniń bas redaktory Liailia Onalbaevanyń baǵy jandy.
«Úzdik respýblikalyq (halyqaralyq) tilshisi Almaty oblysy týraly aqparattyq material) atalymynda «Kazahstanskaia pravda» gazetiniń tilshisi Áset Qalymovtyń aty oza shapty. Bul keshte «Úzdik fotosýretshi» dep «Zaman jarshysy gazetiniń» fototilshisi Erlan Áliasqarov tanyldy.
«Úzdik operator» (beinematerial) atalymy boiynsha júlde «Jetisý» arnasynyń operatory Shalqar Qusaiynovqa buiyrdy.
«Men óte qýanyshtymyn jáne jeńimpaz ataný men úshin úlken mártebe. Meniń jeńisimdi ortaq ujymnyń jeńisi dep sanaimyn. Oblys basshylyǵyna bizge kóp kóńil bólgenderi úshin úlken rahmet. Biz óz materialdarymyzda óńirdiń ómirin kórsetýge tyrysamyz, - dedi Jetisý telearnasynyń operatory Shalqar Qusaiynov.
Tynymsyz tirshilikti tańdaǵan qaýymnyń ishinde «Úzdik telejýrnalist» retinde ózgelerden isi ozǵan jýrnalist «Jetisý» arnasynyń redaktory Sániia Baitarova boldy. «Úzdik jýrnalist» atalymynda «Aiqyn gazetiniń» tilshisi Bolatbek Abaǵan top jardy.
«Oblystyq jýrnalistika salasyna qosqan úlesi úshin (ardager jýrnalist) nominatsiiasy boiynsha «Sport» respýblikalyq gazetiniń menshikti tilshisi Máýlethan Aqsanov júldege laiyq boldy. Osylaisha,tilshiler atqarǵan isine qarai ózara júldeni bólisti.
Rasynda, qoǵam men biliktiń arasynda altyn kópir ornatý ońai emes. Dese de, óz isiniń has sheberleri, talantty qyz-jigitter bul údeden shyǵyp keledi. Munysy týǵan elge degen mahabbat pen mamandyǵyn sheksiz súigendiginiń aiqyn kórinisi. Jýrnalisterge arnalǵan júldeni qanjyǵasyna bailaǵandar biik shyńǵa kóz tikken uly dala qyrandary. Olar jasampaz elmen birge jańa beleske kóterilip keledi. Sonyń arqasynda tiisti tuǵyryna turaqtady.
Anar Sabyrova, Almaty oblysy
