Jetisý óńiriniń ekonomikalyq ál-aýqatynyń artýyna úles qosatyn bul kásiporyn maily daqyldar soia, júgeri, kúnbaǵys óńdep, ósimdik maiyn shyǵaratyn bolady.
Aimaqtaǵy iri keshenniń ashylý saltanatyna oblys ákimi Amandyq Ǵabbasuly arnaiy keldi. Óz kezeginde ol barsha jetisýlyqtardy 1 mamyr Qazaqstan halqynyń birligi kúni merekesimen quttyqtap, aýqymdy jobany qolǵa alǵan azamattarǵa alǵysyn bildirdi.
"Men búgingi merekemen qatar iri zaýyttyń ashylǵanyna qýanyshtymyn. Bul jetistikterge dostyq, beibitshilik, kelisim men ózara túsinistiktiń arqasynda qol jetkizdik. Bul bizdiń agrarlyq oblysymyz úshin óte mańyzdy kásiporyn. Investorlarǵa shyn júrekten alǵysymdy bildiremin. Almaty oblysyna, argarlyq óńirge kerek óndiris orny ashylyp jatyr.
Qabyldanǵan sharalardyń arqasynda ótken jyly oblystyń ónerkásip óndirisiniń kólemi 950 mlrd.teńgeni qurady, biyl 1 trln. teńgeden astam bolady dep kútilýde.
Jyl saiyn daqyldardyń kólemin ulǵaitýǵa basymdyq beremiz. Búgingi ashylyp otyrǵan jańa mai óńdeý zaýyty da osy baǵytta óz úlesin qosady. Osylaisha, biz Elbasy qoldaǵan basty tapsyrmalarmen birge jumys isteimiz.
Almaty oblysy bolashaqta osyndai óndiristerdiń arqasynda agrarly-indýstrialdyq aimaq bolmaq", - dedi Amandyq Batalov.
Jańa joba Qazaqstan Respýblikasynyń indýstriialyq-innovatsiialyq damýynyń memlekettik baǵdarlamasy sheńberinde iske asyrylǵanyn atap ótken jón. Kompaniianyń boi kóterýi úshin memleket tarapynan qoldaý da kórsetilgen. Atap aitsaq, Taldyqorǵan qalasy aýmaǵynan 2033 jyldyń aiaǵyna deiin jalǵa alý quqyǵymen 18,85 ga jer bólingen. Atalmysh jobany iske asyrý úshin 5,8 mlrd. teńge qarjy igerilgen. Ázirge 50 jumys orny ashylyp otyr, ýaqyt óte kele jumys ornynyń sanyn 350-ge jetkizý josparlanǵan.
Zaýytta eńbek etýshilerdiń ortasha jalaqysy 100 myń teńgeni quraidy.
Kásiporyn alynǵan ónimniń sapasyn jaqsartý maqsatynda, tuqymdy óńdeýdiń ekstrýziialyq tehnologiiasy qoldanylatyn Germaniiada qurastyrylǵan sońǵy úlgidegi qural-jabdyqpen jasaqtalǵan.
Táýligine 400 tonna maily daqyldar óńdeledi dep kútilýde. Aldaǵy ýaqytta jańa ashylǵan óndiris orny óńirdiń agroónerkásiptik sektorynyń damýyna yqpal etpek. Osy arqyly jergilikti halyq jumysqa ornalasyp, biýdjetke de salyq túsimderi ulǵaiady.
Kompaniianyń bas direktory, Simonov Sergei Aleksandrovich. Al, jańa óndiris ornynyń bas quryltaishysy táýelsiz Qazaqstan tarihyndaǵy tuńǵysh premer-ministr Sergei Tereshenko. Ol zaýyttyń paidasy týraly aityp, qoldaý bildirgen oblys basshylyǵyna alǵysyn jetkizdi.
«Qazirgi qiyn ýaqytta biz oblys ákiminiń qoldaýymen dostarymyzben osy kásiporyndy ashýdy sheshtik. Onyń qurylysyna shamamen 7 jyl ýaqyt ketti. Almaty oblysy Qytaimen shekarlas aýmaq. Negizgi ónimimiz de solarǵa jóneltilmek. Biz soia, júgeri, raps, kúnbaǵys daqyldaryn óńdep, mai shyǵaramyz. Jergilikti bilik infraqurylym júrgizýge kómektesip, tipti temirjol joldaryn saldy. Elimizdegi tótenshe jaǵdaiǵa qaramastan, Almaty oblysy ákimdiginiń qoldaýymen búgin osy ónerkásip iske qosyldy», - dedi ónerkásiptiń bas aktsioneri Sergei Tereshenko.
«Jetisý Majiko» JShS-gi ázirge shiki zatty Shyǵys Qazaqstannan alyp otyr. Al, pistelerdi kórshiles Resei elinen aldyrtady. Jańa zaýytqa jylyna shamamen 100 myńnan astam shiki zat qajet»,- deidi bas direktor Sergei Simonov.
Óndiriske kerekti ónim kólemin toltyrý úshin endigide jergilikti daqyldardy qoldanbaq niette. Sol úshin Almaty oblysynda 200 ga jerge kúnbaǵys pen maqsary ósirilý kerek eken. Osy maqsatta aimaq basshylyǵymen kelisim shart júrgizilgen .
Jergilikti bilik tarapynan bar jaǵdai jasalǵan. Indýstrialdy aimaqqa jol salynyp, kógildir otyn jetkizilgen. Injenerlik jeli de tartylǵan.
Jumysyn endi bastaǵan zaýyt ónimine suranysta joq emes. Osy kúni kórshiles Qytai elinen 2 tonna maiǵa tapsyrysta kelip túsken. Munysy zaýyttyń naryqta oiyp turyp oryn alatynyna dálel.
Anar SABYROVA
