Satydan Kólsaiǵa aparar joldyń boiynda ornalasqan qonaq úidi qurylysy 2 jyl júrgizilgen. Eki qabatty nysannyń ishi zaman talabyna sai jasaqtalǵan. Qonaq úide 40 adamǵa laiyqtalǵan 20 jatyn oryn daiyndalǵan. Sapasy tamasha, kórinisi kóz tartarlyq sáýlet óneri, ótken adamdy ózine qyzyqtyrmai qoimasy anyq.
Kólsai kólinen 5 minýttyq jerde oryn tepken Kolsay Grand - eko qonaq úi. Aty aityp turǵandai, ǵimarat ieleri munda tabiǵilyqty aldyńǵy orynǵa shyǵarǵan. Aitýlarynsha, Qonaq úi mázirindegi taǵamdar tek ózderi qoldan jasaityn tabiǵi ónimderden daiyndalady eken. Ózgelerden ereksheligi de osynda. Et, kókónister, jemister bári tabiǵi azyq-túlikter qatarynan alynady.
«Eń áýeli barlyq jaǵdai kelýshiler úshin jasalady. Olar bizden joǵary sapaly qyzmet alýyna barymyzdy salamyz. Kelýshilerdiń kóńilderi tolsa sodan asqan baqyt joq. Óitkeni komandamyzdyń kásibiligine baǵa beretinde qonaqtar»,-deidi Kolsay Grand qonaq úiiniń direktory Álisher Taijanov.
Ǵimarattyń qaptalynda «Glemping» salynǵan. Glemping – bul tabiǵatta joǵary dárejede demalý. Kólsai kóliniń mańynda boi kótergen nysandaǵy glempingtiń ereksheligi munda taza aýada qurylatyn shatyrlardy jumsaq tósegi bar jaily úi almastyrady. Sondai-aq, shomylýǵa arnalǵan ózenniń ornyna arnaiy jýynatyn bólmesi bolady. Budan bólek, buqtyrma tamaqtardy, dámi til úiiretin meiramhana taǵamdary almastyrady eken. Mundai demalys jabaiy tabiǵattyń qushaǵynda bolýdy unatatyndarǵa arnalǵan.
«Dál osy mańnan kásip ashý alǵash ret Kólsai kóline kelgen kezde oiǵa keldi. Keiin istiń qamyna kiristik. Eki jyldyń ishinde salyp bittik. Aldaǵy tańda aýlada turǵan «Glemping» sanyn ulǵaitqymyz keledi. Qansha aitqan men eko qonaq úi baǵytyn ustandyq qoi. Áli talai jumys bar jasalatyn»,-deidi Álisher Ábenuly.
Aita keteiik, munda bir kúnge turaqtaý 15 myń teńgege shyǵady. Eń shekti baǵa 36 myńǵa deiin barady. Atalǵan qarajatqa jatyn oryn men úsh ýaqyt tamaqtanýy kiredi. Tian-Shan taýynyń etegindegi Kólsaidyń sulýlyǵyn kóremin deýshi týrister qaýymy aialdaityn kórkem meken keremetti kerek etpeidi. Óz sulýlyǵy ón boiyńdy baýrap alady.
