Almaty oblysynda jylytý maýsymyna daiyndyq jumystary qarqyndy júrgizilýde. Bul týraly Óńirlik kommýnikatsiialar qyzmetinde ótken brifingte aityldy.
Almaty oblystyq energetika jáne TÚKSh basqarmasynyń ókili Erjan Beibitulynyń aitýynsha, oblys boiynsha 43 qazandyqtyń jóndeý jumystary aiaqtalyp, olardyń qýattylyǵy men tiimdiligi artty.
Ile aýdanynyń Boraldai jáne Baiken aýyldaryndaǵy qazandyqtardy jańǵyrtýǵa qosymsha qarjy bólinip, jumystardyń 50%-y aiaqtaldy. Atalǵan 5 qazandyqtyń jumysy qazan aiynda aiaqtalady dep josparlanǵan.
Sonymen qatar, turǵyndarǵa qajetti 714 myń tonna kómir jetkizý úshin kelisimsharttar jasaldy. Qazirgi ýaqytta óńirge 125,1 myń tonna kómir jetkizilip, ortasha baǵasy tonnasyna 18 500-23 000 teńgeni quraidy. Kómir sapasy men qoljetimdiligin qamtamasyz etý maqsatynda barlyq operatorlar qatań qadaǵalanady», – dedi Erjan Beibituly.
Sondai-aq óńirde elektrmen jabdyqtaý jelilerin jańartý da belsendi túrde júzege asyrylýda. 1 185 km elektr jelisin jóndeý josparlanyp, onyń ishinde kúrdeli jóndeýdiń 85%-y, aǵymdaǵy jóndeýdiń 75%-y aiaqtalǵan. Bul sharalar jelilerdiń tozýyn 5%-ǵa tómendetýge jáne turǵyndardy turaqty elektr qýatymen qamtamasyz etýge baǵyttalǵan.
Al oblystyq Tótenshe jaǵdailar departamentiniń memlekettik órt baqylaý basqarmasynyń bas mamany Miras Nurbaiulynyń sózinshe, órt qaýipsizdigin kúsheitý maqsatynda áleýmettik osal toptardyń úilerine kómirtegi totyǵyn anyqtaityn 787 datchik ornatý jumystary júrgizilýde.
«Bul sharalar turǵyndardyń qaýipsizdigin arttyrýǵa jáne jylytý maýsymynyń kedergisiz ótýine baǵyttalǵan. Datchikter áleýmettik osal toptardyń úilerine tegin ornatylady. Onymen qatar turǵyndarǵa órt qaýipsizdigi boiynsha túsindirý jumystary júrgizilip jatyr», – dedi tótenshelik maman.
Aita ketý kerek, óńirde qazandyqtardyń tiimdiligin arttyrý men turǵyndardyń qaýipsizdigin qamtamasyz etýge baǵyttalǵan bul sharalar qysqy maýsymnyń kedergisiz ótýine septigin tigizbek.
