Oblystyq baiqaýdyń saltanatty jiynynda oblys ákiminiń orynbasary Jaqsylyq Omar quttyqtaý sóz sóiledi.
– Búgin óz máresine jetip otyrǵan «Mereili otbasy» baiqaýynyń oblystyq kezeńi qutty bolsyn! El irgesiniń berik ustyny sanalar árbir shańyraqqa bereke-birlik, baqyt pen shattyq tileimin! Elbasymyz Nursultan Ábishuly Nazarbaevtyń bastamasymen qolǵa alynyp otyrǵan baiqaýdyń maqsaty – otbasylyq qundylyqtardy nyǵaitý, tatý-tátti, tárbieli shańyraq múshelerin kópshilikke tanystyrý. El ishinde aýyldastarynyń qurmetine bólengen, ardaqty, berekeli áýletter, ónegesi mol otbasylar barshylyq. Sondyqtan jyl ótken saiyn «Mereili otbasy» baiqaýynyń máni artyp, qatysqysy keletinderdiń qatary ulǵaiyp keledi. Mereili otbasylardy úlgi-ónege etý arqyly óskeleń urpaqty izgilikke tárbielei alamyz. Búgingi baiqaý jeńimpazdaryn shyn júrekten quttyqtaimyn! – dei kele J.Omar júldegerlerdi marapattap, syi-siiapattar tapsyrdy.
I dárejeli diplommen eki otbasy – Jambyl aýdanynan kelgen Jarasovtar men Uiǵyr aýdanynyń turǵyndary Kójekbaevtar otbasy marapattaldy.
Jarasovtar otbasy – «Jasyl el» memlekettik baǵdarlamasyn júzege asyrýǵa aýqymdy úles qosqan áýlet. Otaǵasy Maqsymjan Jarasov millionnan astam aǵash otyrǵyzǵan. Memleket basshysynyń Jarlyǵymen «Qurmet» ordenin ielenip, «Ekologiia salasynyń úzdigi» tósbelgisin alǵan. 8 balany aiaqtandyryp, 40 nemere, 21 shóbere kórip otyr. Kójekbaevtar otbasynyń da úlgisi eren. Kúrishbek Kójekbaev – Uly Otan soǵysynyń ardageri, soǵystan keiinde eldiń áleýmettik-ekonomikalyq damýyna zor úles qosty. Birneshe memlekettik nagradalarǵa ie bolǵan, sonyń ishinde «Qurmet» ordeni de bar. Qazirgi kezde 105 jastaǵy ardager 4 baladan 25 nemere, 30 shóbere, 15 shópshek súiip otyr.
Eki otbasy da elordada ótetin respýblikalyq baiqaýda baq synap, oblystyń namysyn qorǵaityn bolady.
Ekinshi oryndy Uiǵyr aýdanynyń turǵyndary Hamraevtar otbasy men taldyqorǵandyq Myrzataevtar jáne Eskeldi aýdanynan Taijanovtar ielenip, 300 myń teńgeniń sertifikatyn aldy. Úshinshi orynǵa laiyq dep tanylǵan alakóldik Qojabekovter otbasy, Eńbekshiqazaq aýdanynan Qartbaevtar jáne Qarasai aýdanynan kelgen Janǵuttylar otbasyna IIIdárejeli diplom men 250 myń teńgeniń sertifikaty berildi. Bular oblystyń saýda, shyǵarmashylyq, aýyl sharýashylyǵy, áskeri qyzmet salalarynda eńbek etip júrgen ónegeli otbasylar.
Baiqaýǵa qatysqan basqa 30 otbasyna da oblys ákiminiń alǵys hattary men aqshalai syilyqtar usynyldy.
Qatysýshylar men jeńimpazdar atynan sóz alǵan Kúrishbek ata Elbasynyń saliqaly saiasatyn júrgizýge árkim de atsalysý kerektigin, eń aldymen jas urpaq anasyn, úlkenderdi syilaýy qajettigin jáne eńbekti súiip, bereke-birlikte ómir súrý kerektigin atap ótip, batasyn berdi.
Jalpy, baiqaýdyń alǵashqy kezeńinde Almaty oblysy boiynsha 290 otbasy qatyssa, solardyń 38-i qazylar alqasynyń joǵary baǵasyn alyp, oblystyq baiqaýǵa joldama alǵan. Jyl otbasy ataǵyna kóp balaly otbasylar, eńbek áýletteri, shyǵarmashylyq otbasylar, dárigerler, muǵalimder áýletteri jáne basqa da úlgili shańyraqtar úmitker boldy.
Almaty oblysy ákiminiń baspasóz qyzmeti
