وبلىستىق بايقاۋدىڭ سالتاناتتى جيىنىندا وبلىس اكىمىنىڭ ورىنباسارى جاقسىلىق ومار قۇتتىقتاۋ ءسوز سويلەدى.
– بۇگىن ءوز مارەسىنە جەتىپ وتىرعان «مەرەيلى وتباسى» بايقاۋىنىڭ وبلىستىق كەزەڭى قۇتتى بولسىن! ەل ىرگەسىنىڭ بەرىك ۇستىنى سانالار ءاربىر شاڭىراققا بەرەكە-بىرلىك، باقىت پەن شاتتىق تىلەيمىن! ەلباسىمىز نۇرسۇلتان ءابىش ۇلى نازاربايەۆتىڭ باستاماسىمەن قولعا الىنىپ وتىرعان بايقاۋدىڭ ماقساتى – وتباسىلىق قۇندىلىقتاردى نىعايتۋ، ءتاتۋ-تاتتى، تاربيەلى شاڭىراق مۇشەلەرىن كوپشىلىككە تانىستىرۋ. ەل ىشىندە اۋىلداستارىنىڭ قۇرمەتىنە بولەنگەن، ارداقتى، بەرەكەلى اۋلەتتەر، ونەگەسى مول وتباسىلار بارشىلىق. سوندىقتان جىل وتكەن سايىن «مەرەيلى وتباسى» بايقاۋىنىڭ ءمانى ارتىپ، قاتىسقىسى كەلەتىندەردىڭ قاتارى ۇلعايىپ كەلەدى. مەرەيلى وتباسىلاردى ۇلگى-ونەگە ەتۋ ارقىلى وسكەلەڭ ۇرپاقتى ىزگىلىككە تاربيەلەي الامىز. بۇگىنگى بايقاۋ جەڭىمپازدارىن شىن جۇرەكتەن قۇتتىقتايمىن! – دەي كەلە ج.ومار جۇلدەگەرلەردى ماراپاتتاپ، سىي-سياپاتتار تاپسىردى.
I دارەجەلى ديپلوممەن ەكى وتباسى – جامبىل اۋدانىنان كەلگەن جاراسوۆتار مەن ۇيعىر اۋدانىنىڭ تۇرعىندارى كوجەكبايەۆتار وتباسى ماراپاتتالدى.
جاراسوۆتار وتباسى – «جاسىل ەل» مەملەكەتتىك باعدارلاماسىن جۇزەگە اسىرۋعا اۋقىمدى ۇلەس قوسقان اۋلەت. وتاعاسى ماقسىمجان جاراسوۆ ميلليوننان استام اعاش وتىرعىزعان. مەملەكەت باسشىسىنىڭ جارلىعىمەن «قۇرمەت» وردەنىن يەلەنىپ، «ەكولوگيا سالاسىنىڭ ۇزدىگى» توسبەلگىسىن العان. 8 بالانى اياقتاندىرىپ، 40 نەمەرە، 21 شوبەرە كورىپ وتىر. كوجەكبايەۆتار وتباسىنىڭ دا ۇلگىسى ەرەن. كۇرىشبەك كوجەكبايەۆ – ۇلى وتان سوعىسىنىڭ ارداگەرى، سوعىستان كەيىندە ەلدىڭ الەۋمەتتىك-ەكونوميكالىق دامۋىنا زور ۇلەس قوستى. بىرنەشە مەملەكەتتىك ناگرادالارعا يە بولعان، سونىڭ ىشىندە «قۇرمەت» وردەنى دە بار. قازىرگى كەزدە 105 جاستاعى ارداگەر 4 بالادان 25 نەمەرە، 30 شوبەرە، 15 شوپشەك ءسۇيىپ وتىر.
ەكى وتباسى دا ەلوردادا وتەتىن رەسپۋبليكالىق بايقاۋدا ب ا ق سىناپ، وبلىستىڭ نامىسىن قورعايتىن بولادى.
ەكىنشى ورىندى ۇيعىر اۋدانىنىڭ تۇرعىندارى حامرايەۆتار وتباسى مەن تالدىقورعاندىق مىرزاتايەۆتار جانە ەسكەلدى اۋدانىنان تايجانوۆتار يەلەنىپ، 300 مىڭ تەڭگەنىڭ سەرتيفيكاتىن الدى. ءۇشىنشى ورىنعا لايىق دەپ تانىلعان الاكولدىك قوجابەكوۆتەر وتباسى، ەڭبەكشىقازاق اۋدانىنان قارتبايەۆتار جانە قاراساي اۋدانىنان كەلگەن جانعۇتتىلار وتباسىنا IIIدارەجەلى ديپلوم مەن 250 مىڭ تەڭگەنىڭ سەرتيفيكاتى بەرىلدى. بۇلار وبلىستىڭ ساۋدا، شىعارماشىلىق، اۋىل شارۋاشىلىعى، اسكەري قىزمەت سالالارىندا ەڭبەك ەتىپ جۇرگەن ونەگەلى وتباسىلار.
بايقاۋعا قاتىسقان باسقا 30 وتباسىنا دا وبلىس اكىمىنىڭ العىس حاتتارى مەن اقشالاي سىيلىقتار ۇسىنىلدى.
قاتىسۋشىلار مەن جەڭىمپازدار اتىنان ءسوز العان كۇرىشبەك اتا ەلباسىنىڭ ساليقالى ساياساتىن جۇرگىزۋگە اركىم دە اتسالىسۋ كەرەكتىگىن، ەڭ الدىمەن جاس ۇرپاق اناسىن، ۇلكەندەردى سىيلاۋى قاجەتتىگىن جانە ەڭبەكتى ءسۇيىپ، بەرەكە-بىرلىكتە ءومىر ءسۇرۋ كەرەكتىگىن اتاپ ءوتىپ، باتاسىن بەردى.
جالپى، بايقاۋدىڭ العاشقى كەزەڭىندە الماتى وبلىسى بويىنشا 290 وتباسى قاتىسسا، سولاردىڭ 38ء-ى قازىلار القاسىنىڭ جوعارى باعاسىن الىپ، وبلىستىق بايقاۋعا جولداما العان. جىل وتباسى اتاعىنا كوپ بالالى وتباسىلار، ەڭبەك اۋلەتتەرى، شىعارماشىلىق وتباسىلار، دارىگەرلەر، مۇعالىمدەر اۋلەتتەرى جانە باسقا دا ۇلگىلى شاڭىراقتار ۇمىتكەر بولدى.
الماتى وبلىسى اكىمىنىڭ باسپا ءسوز قىزمەتى
