Almaty oblysynda bótelkedegi sý men tabiǵi shyryn óndiretin zaýyt ashyldy
Nysannyń resmi ashylýyna Jambyl aýdanynyń ákimi Nurlan Ertas qatysty.
– Birinshi kezekte barshańyzdy Qazaqstan Táýelsizdiginiń 30 jyldyǵymen quttyqtaimyn! Jańa kásiporyndar ashý, investitsiia tartý, jańa jumys oryndaryn qurý – bul Memleket basshysynyń tapsyrmalarynyń biri. Osy baǵytta Jambyl aýdany da belsendi jumys júrgizip keledi. Búgingi kúni Táýelsizdiktiń 30 jyldyǵyna orai «AI-RAI OLL» JShS zaýytyn ashyp otyrmyz. Taza aýyz sý, sýsyndar men tabiǵi shyryndar shyǵaratyn zaýyt jańa jumys oryndaryn ashyp, aýdan ekonomikasyn damytýǵa óz úlesin qosady dep senemin, – dedi N.Ertas.
Jalpy jobanyń quny 372,1 mln. teńge. Seriktestik 1-shi kezeginde kólemi 0,5 litrden 5 litrge deiin bótelge quiylǵan aýyz sý shyǵara bastaidy. 2-shi kezeginde kásiporyn irgesi keńeitilip, túrli sýsyndar men shyryn shyǵarmaq. «AI-RAI OLL» JShS 15 túrli otandyq ónim shyǵarýdy, 40 jumys ornyn ashýdy kózdep otyr. Josparlanǵan ónim kólemi – shamamen 1,4 mlrd. teńge nemese 12 600 dana ónim. Bul ázirge ishki naryqqa shyǵarylady.
Jambyl aýdandyq ákimdiginiń habarlaýynsha, aýdanda 2021 jyldyń 10 aiynda ónerkásip óndirisiniń kólemi 15 mlrd. teńge boldy. Shaǵyn jáne orta bizneste 8626 nysan jumys isteidi, ekonomikalyq belsendi halyqtyń 15% nemese 14 myń adam osy salada jumys isteidi. Shaǵyn bizneste 35 mlrd. teńgeniń ónimi óndirilgen. Aýdan ekonomikasyna 20,2 mlrd. teńge investitsiia tartyldy. Bul ótken jylmen salystyrǵanda 5,2 % artyq. Jalpy Jambyl aýdanynda 2025 jylǵa deiin 300 jańa jumys ornyn quratyn quny 22,7 mlrd. teńgelik 5 investitsiialyq jobany iske asyrý kózdelgen.
