Semınar barysynda óńirimiz boıynsha onomastıkanyń búgingi jaı-kúıi men mańyzdylyǵy jan-jaqty talqylanyp, eldi mekenderdiń tarıhı ataýlaryn qalpyna keltirýge qatysty oı-pikirler órbidi. Oblystyq jáne jergilikti máseleler boıynsha aqparattar men tájirıbe almasýdyń jaıy da tilge tıek etildi.
Prezıdentimiz Nursultan Ábishuly Nazarbaev: «Halqymyz jerge at qoıý arqyly eliniń tarıhyn jazyp otyrǵan. Táýelsiz memlekettiń bir belgisi – onyń ulttyq nyshandary desek, sol ulttyń nyshandary eldi mekenderdiń, kóshelerdiń, alańdardyń attarynan da kórinip turýǵa tıis», – degen sózi til salasynda júrgen mamandardyń basty nazarynda bolýy tıis. Semınar-keńesti ashyp, júrgizgen oblystyq tilderdi damytý jónindegi basqarmasynyń basshysy Aıdar Karbozuly osylaı dedi.
Keleli keńeste baıandama jasaǵan İ. Jansúgirov atyndaǵy Jetisý Memlekettik ýnıversıtetiniń qazaq tili men ádebıet kafedrasynyń profesory, fılologıa ǵylymdarynyń doktory, oblystyq onomastıka komısıasynyń múshesi Qanıpash Mádibaeva, İ. Jansúgirov atyndaǵy Jetisý memlekettik ýnıversıtetiniń qazaq tili men ádebıeti kafedrasynyń profesory, fılologıa ǵylymdarynyń kandıdaty, frazeolog-ǵalym Qarlyǵash Sarbasova óńirlerdegi onomastıkalyq ataýlardy retteý máseleleri boıynshe keńinen áńgime qozǵap, óz usynystaryn da ortaǵa saldy. Semınardy basqarma basshysy Aıdar Bashbaev qorytyndylap, «Til tazalyǵyn saqtaıyq» aksıasyna belsene qatysyp, memlekettik til mártebesin arttyrýǵa qosqan úlesi úshin İle, Talǵar, Alakól, Eskeldi aýdandary men Taldyqorǵan qalasy ákimdigine basqarmanyń Alǵys hatyn tabystady.
