سەمينار بارىسىندا ءوڭىرىمىز بويىنشا ونوماستيكانىڭ بۇگىنگى جاي-كۇيى مەن ماڭىزدىلىعى جان-جاقتى تالقىلانىپ، ەلدى مەكەندەردىڭ تاريحي اتاۋلارىن قالپىنا كەلتىرۋگە قاتىستى وي-پىكىرلەر ءوربىدى. وبلىستىق جانە جەرگىلىكتى ماسەلەلەر بويىنشا اقپاراتتار مەن تاجىريبە الماسۋدىڭ جايى دا تىلگە تيەك ەتىلدى.
پرەزيدەنتىمىز نۇرسۇلتان ءابىش ۇلى نازاربايەۆ: «حالقىمىز جەرگە ات قويۋ ارقىلى ەلىنىڭ تاريحىن جازىپ وتىرعان. تاۋەلسىز مەملەكەتتىڭ ءبىر بەلگىسى – ونىڭ ۇلتتىق نىشاندارى دەسەك، سول ۇلتتىڭ نىشاندارى ەلدى مەكەندەردىڭ، كوشەلەردىڭ، الاڭداردىڭ اتتارىنان دا كورىنىپ تۇرۋعا ءتيىس»، – دەگەن ءسوزى ءتىل سالاسىندا جۇرگەن مامانداردىڭ باستى نازارىندا بولۋى ءتيىس. سەمينار-كەڭەستى اشىپ، جۇرگىزگەن وبلىستىق تىلدەردى دامىتۋ جونىندەگى باسقارماسىنىڭ باسشىسى ايدار كاربوز ۇلى وسىلاي دەدى.
كەلەلى كەڭەستە بايانداما جاساعان ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ قازاق ءتىلى مەن ادەبيەت كافەدراسىنىڭ پروفەسسورى، فيلولوگيا عىلىمدارىنىڭ دوكتورى، وبلىستىق ونوماستيكا كوميسسياسىنىڭ مۇشەسى قانيپاش مادىبايەۆا، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ قازاق ءتىلى مەن ادەبيەتى كافەدراسىنىڭ پروفەسسورى، فيلولوگيا عىلىمدارىنىڭ كانديداتى، فرازەولوگ-عالىم قارلىعاش سارباسوۆا وڭىرلەردەگى ونوماستيكالىق اتاۋلاردى رەتتەۋ ماسەلەلەرى بويىنشە كەڭىنەن اڭگىمە قوزعاپ، ءوز ۇسىنىستارىن دا ورتاعا سالدى. سەميناردى باسقارما باسشىسى ايدار باشبايەۆ قورىتىندىلاپ، «ءتىل تازالىعىن ساقتايىق» اكسياسىنا بەلسەنە قاتىسىپ، مەملەكەتتىك ءتىل مارتەبەسىن ارتتىرۋعا قوسقان ۇلەسى ءۇشىن ىلە، تالعار، الاكول، ەسكەلدى اۋداندارى مەن تالدىقورعان قالاسى اكىمدىگىنە باسقارمانىڭ العىس حاتىن تابىستادى.
