Jetisýlyq jurtshylyǵy «Jastar» saiabaǵynda qydyryp, merekelik sharalardy tamashalady. Oblys ákimi Amandyq Batalov kishkentai balǵyndardyń tusaýyn kesip, kópshilikti Ulys kúnimen quttyqtady, - dep habarlaidy Almaty oblysy ákiminiń baspasóz qyzmeti.
Ulystyń Uly kúni – Naýryz merekesi Taldyqorǵan qalasynda bulaqtyń kózin ashyp, № 28 IT mekteptiń aldyna aǵash otyrǵyzýdan bastaldy.
Bul iske oblys ákimi Amandyq Batalovpen birge aqsaqaldar men ziialy qaýym ókilderi, Assambleia músheleri, jastar men oqýshylar atsalysty. Qalanyń 8-shi shaǵyn aýdanyndaǵy 56 páterli turǵyn paidalanýǵa berilip kiltteri tapsyryldy.
Osy kúni «Jastar» Sport saraiynyń aýmaǵynda ornalasqan «Taiqazan alańynda» merekege arnalǵan 1 tonna baýyrsaq pen 5 myń litr Naýryz kóje kelgen adamdarǵa tegin taratyldy.
Memlekettik Tý alańynda Jastar aýyly quryldy. Osy jerde ata-analardyń suraýymen oblys ákimi Amandyq Batalov «Tusaý keser» rásimin atqaryp, kishkentai búldirshinderge estelik syilyqtar úlestirildi. «Jastar» mádeni-demalys saiabaǵynyń kireberisinde «Jetisý» telearnasynyń 20 jyldyǵyna arnalǵan kórme, merekelik baǵdarlamalar, ulttyq qolóner kórmesi, ulttyq oiyndar jáne t.b. oiyn-saýyq usynyldy. «Naýryz tartýy» degen atpen ulttyq taǵamdar – jent, talqan, balqaimaq, kilegei, qurt, súzbe, ýyz, irimshik jáne basqa da dámder, sol siiaqty ulttyq syi-kádeler qoiyldy.
«Uly Dalanyń jeti qyry» kiiz úiler alańynda jeti kiiz úi tigilip, Elbasy baǵdarlamasy boiynsha «Ashyq aspan astyndaǵy murajai ekspozitsiiasynyń» kórmeleri tanystyryldy.
Saiabaqtyń negizgi sahnasynda mereke tabiǵattyń oianaýyn, Naýryz ulaǵaty men rásimderin pash ete bilgen «Kúlimde, Naýryz, kúlimde!» atty mýzykalyq-horeografiialyq kórinispen bastaldy. Án men bidiń barlyǵy da Naýryz taqyrybyna arnalyp, kóktemniń shýaqty merekesiniń bar sán-saltanatyn, bolmys-bitimin, mán-mazmunyn asha bildi.
Jinalǵan qaýymdy merekemen quttyqtaǵan oblys ákimi Amandyq Batalov:
- Áz Naýryz – eńsesi biik eldiktiń, irgesi bekem birliktiń, sarqylmas yrystyń bastaýy. Ulystyń uly kúnin halqymyz jyl saiyn shat kóńil, keń peiilmen qarsy alady. Bul mereke kóp etnosty Qazaqstan halqyn dostyq pen tatýlyqqa shaqyryp, igi isterge jumyldyryp keledi.
Jyl basy sanalatyn osy mereili kúninde ótken jyl elimiz úshin tabysty kezeń bolǵanyn rizashylyqpen aitamyz. Jyl basy Naýryz Otanymyzǵa jańa tabystar ákelsin. Qazaqstannyń abyroiy artyp, aibyny asqaq bolsyn! Ulystyń Uly kúni ár shańyraqqa baqyt pen shattyq ornap, qut darysyn! Barshańyzǵa kóktemdei kóńil kúi, molshylyq, bereke-birlik tileimin! Ulys oń bolsyn, mereke qutty bolsyn! – dedi óz quttyqtaýynda.
Sonymen qatar «Batamen el kógerer» respýblikalyq baiqaýynyń jeńimpazy, aqsaqal Jaqypbek Ómirbek merekelik tilegin bildirip, bata berdi.
Altynai Jorabaeva, Kámshat Jorabaeva, Alisher Karimov syndy óner juldyzdary men oblystyq óner ujymdary jetisýlyqtarǵa merekelik kóńil kúi sylaidy.
Eske salsaq, keshkilik «Jastar» saiabaǵynda jastarǵa arnalǵan «Kóktem merekesiniń jaryq juldyzdary» atty eki saǵattyq diskobaǵdarlama uiymdastyrylady.
