Bostandyq aýdanyna qarasty M.Maqataev atyndaǵy №140-mektep-gimnaziiasynda 5-synyp oqýshylary arasynda Qazaqstan Respýblikasy Táýelsizdiginiń 30 jyldyǵyna orai «Táýelsizdik jetistikteri» atty synyptyq tárbie saǵaty ótti.
Ashyq tárbie saǵatynyń maqsaty – bilim men tárbie berý, oqýshylarǵa 30 jylda elimiz jetken 30 jetistikti nasihattaý.
Synyp saǵaty memlekettik Ánuranmen bastaldy. Dáris barysynda táýelsizdik jyldaryndaǵy memlekettik qurylystyń negizgi qorytyndylary men perspektivalary, sondai-aq Qazaqstan Respýblikasynyń Tuńǵysh Prezidenti – Elbasy N.Á.Nazarbaevtyń táýelsiz memleketti nyǵaitýdaǵy tarihi róli týraly aityldy.
Bostandyq aýdany boiynsha oqýshylar arasynda túrli ashyq sabaqtar, sýret kórmeleri, sporttyq oiyndar, baiqaýlar ótkiziledi. Aýdanda 34 memlekettik, 24 jeke menshik mektep bar. Memlekettik mektepterde 37 myńdai oqýshy oqidy. Bastaýysh, orta jáne joǵarǵy býyn arasynda is-sharalar aldymen mekteptiń ózinde, keiin aýdan boiynsha ótedi.
– Jyldyń sońyna deiin ótetin is-sharanyń M.Maqataev atyndaǵy mektep-gimnaziiasynda bastalýynyń ózi teginnen tegin emes. Biyl aqiyq aqyn M.Maqataevtyń týǵanyna 90 jyl tolyp otyr, ári bul mektep – qaladaǵy eń úzdik mektepterdiń biri. Soǵan bailanysty taǵylymdy sharalardy biz osy mektepten bastaǵandy jón kórdik, – dedi Baqytbek Bostandyquly.
Joǵary oqý oryndary stýdentteriniń arasynda da Táýelsizdik uǵymy nasihattalyp, onyń tarihi alǵysharttary men saiasi kórinisi túsindirildi. Mysaly, S.J.Asfendiiarov atyndaǵy Qazaq ulttyq meditsina ýniversitetiniń qabyrǵasynda «Táýelsizdik jyldaryndaǵy egemendi elimizdiń jáne S.J.Asfendiiarov atyndaǵy QazUMÝ-dyń tuǵyrly jetistikteri» atty merekelik shara ótkizildi.
Ekinshi kýrs stýdentteri arasynda uiymdastyrylǵan shara ádettegidei Ánuranmen bastalyp, atalmysh oqý ornynyń Korporativtik damý jónindegi prorektory, professor Ýbaidýlla Mahambetulynyń alǵy sózimen jalǵasty.
– Bul sharany Táýelsizdigimizdiń 30 jyldyq mereitoiy qarsańynda uiymdastyryp otyrmyz. Otyz jyl tarih keńistiginde az ba, kóp pe degen suraq týyndaidy. Meniń oiymsha, másele ýaqyttyń uzaqtyǵynda emes, osy jyl ishinde atqarylǵan jumystardyń nátijeliliginde. Otyz jylda elimizde eleýli tarihi ózgerister oryn aldy.
Saiasi arenada bolsyn, ekonomikalyq turǵydan bolsyn Qazaqstan óz atyn shyǵaryp, ómirlik mańyzy bar barlyq salalarda damydy. Sonyń ishinde bilim salasynda talai reformalar júrgizilip, joǵary oqý oryndarynda bilim berýdiń jańa júieleri engizildi. Oǵan bizdiń ýniversitettegi ózgerister dálel. Qazir biz elimizdegi meditsinalyq ýniversitetter arasynda QS reitingine engen jalǵyz oqý ornymyz. Atap aitsaq, Bolon protsesi, akademiialyq utqyrlyq, sheteldik tájirbie, taǵysyn taǵy. Joǵarydaǵy atqarylǵan jumystardyń júgi aýyr dep oilaimyn, sondyqtan 30 jylda el retinde jetken jetistigimiz jeterlik dep dóp basyp aita alamyz, – dedi prorektor.
Odan bólek, saiasattanýshy Talǵat Janysbai, qazaqstan tarihy jáne áleýmettik-gýmanitarlyq pánder kafedrasynyń assistenti Ǵalym Alaýdiuly syndy qonaqtar da óz oilarymen bólisip, stýdenttermen pikirtalas órbitti.
Ýniversitet prorektory Ýbaidýlla Mahambetuly mundai sharalar jyl boiy jalǵasyn tabatynyn, bul tek bastama ekenin jetkizdi. Jalpy jyl boiy Táýelsizdiktiń 30 jyldyǵy respýblika boiynsha barlyq mektepter men joǵary oqý oryndarynda keńinen atalyp ótpek.
