بوستاندىق اۋدانىنا قاراستى م.ماقاتايەۆ اتىنداعى №140-مەكتەپ-گيمنازياسىندا 5-سىنىپ وقۋشىلارى اراسىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا وراي «تاۋەلسىزدىك جەتىستىكتەرى» اتتى سىنىپتىق تاربيە ساعاتى ءوتتى.
اشىق تاربيە ساعاتىنىڭ ماقساتى – ءبىلىم مەن تاربيە بەرۋ، وقۋشىلارعا 30 جىلدا ەلىمىز جەتكەن 30 جەتىستىكتى ناسيحاتتاۋ.
سىنىپ ساعاتى مەملەكەتتىك انۇرانمەن باستالدى. ءدارىس بارىسىندا تاۋەلسىزدىك جىلدارىنداعى مەملەكەتتىك قۇرىلىستىڭ نەگىزگى قورىتىندىلارى مەن پەرسپەكتيۆالارى، سونداي-اق قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازاربايەۆتىڭ تاۋەلسىز مەملەكەتتى نىعايتۋداعى تاريحي ءرولى تۋرالى ايتىلدى.
بوستاندىق اۋداندىق ءبىلىم ءبولىمىنىڭ باسشىسى باقىتبەك بوستاندىق ۇلىنىڭ ايتۋىنشا، ەل تاۋەلسىزدىگىنىڭ 30 جىلدىعىنا بايلانىستى مۇنداي ءىس-شارالار قالاداعى ءار مەكتەپ پەن بالاباقشادا وقۋ جىلىنىڭ اياعىنا دەيىن ۇيىمداستىرىلادى.
بوستاندىق اۋدانى بويىنشا وقۋشىلار اراسىندا ءتۇرلى اشىق ساباقتار، سۋرەت كورمەلەرى، سپورتتىق ويىندار، بايقاۋلار وتكىزىلەدى. اۋداندا 34 مەملەكەتتىك، 24 جەكە مەنشىك مەكتەپ بار. مەملەكەتتىك مەكتەپتەردە 37 مىڭداي وقۋشى وقيدى. باستاۋىش، ورتا جانە جوعارعى بۋىن اراسىندا ءىس-شارالار الدىمەن مەكتەپتىڭ وزىندە، كەيىن اۋدان بويىنشا وتەدى.
– جىلدىڭ سوڭىنا دەيىن وتەتىن ءىس-شارانىڭ م.ماقاتايەۆ اتىنداعى مەكتەپ-گيمنازياسىندا باستالۋىنىڭ ءوزى تەگىننەن تەگىن ەمەس. بيىل اقيىق اقىن م.ماقاتايەۆتىڭ تۋعانىنا 90 جىل تولىپ وتىر، ءارى بۇل مەكتەپ – قالاداعى ەڭ ۇزدىك مەكتەپتەردىڭ ءبىرى. سوعان بايلانىستى تاعىلىمدى شارالاردى ءبىز وسى مەكتەپتەن باستاعاندى ءجون كوردىك، – دەدى باقىتبەك بوستاندىق ۇلى.
جوعارى وقۋ ورىندارى ستۋدەنتتەرىنىڭ اراسىندا دا تاۋەلسىزدىك ۇعىمى ناسيحاتتالىپ، ونىڭ تاريحي العىشارتتارى مەن ساياسي كورىنىسى ءتۇسىندىرىلدى. مىسالى، س.ج.اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ قابىرعاسىندا «تاۋەلسىزدىك جىلدارىنداعى ەگەمەندى ەلىمىزدىڭ جانە س.ج.اسفەندياروۆ اتىنداعى قازۇمۋ-دىڭ تۇعىرلى جەتىستىكتەرى» اتتى مەرەكەلىك شارا وتكىزىلدى.
ەكىنشى كۋرس ستۋدەنتتەرى اراسىندا ۇيىمداستىرىلعان شارا ادەتتەگىدەي انۇرانمەن باستالىپ، اتالمىش وقۋ ورنىنىڭ كورپوراتيۆتىك دامۋ جونىندەگى پرورەكتورى، پروفەسسور ۋبايدۋللا ماحامبەت ۇلىنىڭ العى سوزىمەن جالعاستى.
– بۇل شارانى تاۋەلسىزدىگىمىزدىڭ 30 جىلدىق مەرەيتويى قارساڭىندا ۇيىمداستىرىپ وتىرمىز. وتىز جىل تاريح كەڭىستىگىندە از با، كوپ پە دەگەن سۇراق تۋىندايدى. مەنىڭ ويىمشا، ماسەلە ۋاقىتتىڭ ۇزاقتىعىندا ەمەس، وسى جىل ىشىندە اتقارىلعان جۇمىستاردىڭ ناتيجەلىلىگىندە. وتىز جىلدا ەلىمىزدە ەلەۋلى تاريحي وزگەرىستەر ورىن الدى.
ساياسي ارەنادا بولسىن، ەكونوميكالىق تۇرعىدان بولسىن قازاقستان ءوز اتىن شىعارىپ، ومىرلىك ماڭىزى بار بارلىق سالالاردا دامىدى. سونىڭ ىشىندە ءبىلىم سالاسىندا تالاي رەفورمالار جۇرگىزىلىپ، جوعارى وقۋ ورىندارىندا ءبىلىم بەرۋدىڭ جاڭا جۇيەلەرى ەنگىزىلدى. وعان ءبىزدىڭ ۋنيۆەرسيتەتتەگى وزگەرىستەر دالەل. ءقازىر ءبىز ەلىمىزدەگى مەديسينالىق ۋنيۆەرسيتەتتەر اراسىندا QS رەيتينگىنە ەنگەن جالعىز وقۋ ورنىمىز. اتاپ ايتساق، بولون پروسەسى، اكادەميالىق ۇتقىرلىق، شەتەلدىك تاجىربيە، تاعىسىن تاعى. جوعارىداعى اتقارىلعان جۇمىستاردىڭ جۇگى اۋىر دەپ ويلايمىن، سوندىقتان 30 جىلدا ەل رەتىندە جەتكەن جەتىستىگىمىز جەتەرلىك دەپ ءدوپ باسىپ ايتا الامىز، – دەدى پرورەكتور.
كەلەسى كەزەكتە ارنايى شاقىرىلعان قوناق – استانالىق مەديسينا ۋنيۆەرسيتەتىنىڭ پروفەسسورى، تاريح عىلىمىنىڭ دوكتورى جاننا ءسابيت قىزى سوناۋ ساق-سارماتتاردان باستاپ، 1986 جىلى جالىنداعان قازاق جاستارىنىڭ كوتەرىلىسىنە دەيىنگى تاريحي وقيعالاردى جىپكە ءتىزىپ ايتىپ بەردى. سول ارقىلى ەگەمەندىككە اكەلگەن جولدىڭ تار جول، تايعاق كەشۋ ەكەنىن تۇسىندىرگەندەي اسەر قالدىردى.
ودان بولەك، ساياساتتانۋشى تالعات جانىسباي، قازاقستان تاريحى جانە الەۋمەتتىك-گۋمانيتارلىق پاندەر كافەدراسىنىڭ اسسيستەنتى عالىم الاۋدي ۇلى سىندى قوناقتار دا ءوز ويلارىمەن ءبولىسىپ، ستۋدەنتتەرمەن پىكىرتالاس ءوربىتتى.
ۋنيۆەرسيتەت پرورەكتورى ۋبايدۋللا ماحامبەت ۇلى مۇنداي شارالار جىل بويى جالعاسىن تاباتىنىن، بۇل تەك باستاما ەكەنىن جەتكىزدى. جالپى جىل بويى تاۋەلسىزدىكتىڭ 30 جىلدىعى رەسپۋبليكا بويىنشا بارلىق مەكتەپتەر مەن جوعارى وقۋ ورىندارىندا كەڭىنەن اتالىپ وتپەك.
