– Koronavırýstyń «Delta» nusqasy óte qaýipti ekeni qupıa emes. Onyń aınalymyn eskere otyryp, men jasóspirimderdi vaksınalaýdy bastaýǵa barlyq negizderdi kórip otyrmyn, onyń ústine bizde Pfizer sıaqty qorǵaný quraly bar, – deıdi «Almatynyń stýdentter alánsy» korporatıvtik qorynyń basshysy Jasulan Qýandyq.
Stýdentter alánsynyń jetekshisi elimizde koronavırýsqa qarsy ımmýndaý qol jetimdi jáne aqysyz ekenin, sondyqtan eresekter kelip, vaksınasıadan ótip, balalardy aýrýdan qorǵaýy kerek ekenin atap ótti.
Jasulan Qýandyq koronavırýs búkil álemde úırenshikti ómir saltyn buzǵanyn, oqýshylar men stýdentterdiń bir jarym jyl boıy dástúrli formatta oqýǵa múmkindigi bolmaǵanyn atap ótti. Ol vaksınalanbaǵan qatty aýyrǵan dostaryn juqtyrý oqıǵalary týraly aıtty. Sonymen qatar, onyń aınalasynda kóptegen vaksınalanǵandar da bar. Jasýlannyń ózi qytaılyq Vero Cell vaksınasymen egildi, sodan keıin ol janama áserlerdi sezinbedi.
Stýdentter alánsy jetekshisiniń málimeti boıynsha Almatyda 18 jasqa tolmaǵan 180 myńǵa jýyq stýdent bar. Olardyń árqaısysymen eriktiler vaksınasıa máseleleri boıynsha túsindirý jumystaryn júrgizedi.
Jastar kóshbasshysynyń pikirine Almaty qalasynyń jastar saıasatyn damytý memlekettik qory jobalarynyń ákimgeri Mádına Imanǵojanova qosyldy. Onyń pikirinshe, ata-analar vaksınasıadan keıingi asqynýlardan qoryqpaýy kerek, jasóspirimder Pfizer vaksınasıasyn jeńil qabyldaıdy, al koronavırýstyń asqyný qaýpi birneshe ese joǵary.
Megapolıstiń Qoǵamdyq densaýlyq basqarmasynyń málimetinshe, 1 aqpannan 15 qarashaǵa deıingi aralyqta birinshi komponentpen 1 011 781, ekinshi komponentpen – 951 261 almatylyq egildi. Egilgenderdiń jalpy sanynan 60 jastan asqandar 121 595 adamdy quraıdy.
Ótken jumadan bastap Pfizer preparatymen 160 júkti áıel, 552 bala emizetin áıel jáne 1130 jasóspirim egildi.
