Megapolıste 8 sáýirinen 8 mamyryna deıin ótetin «Almaty - bizdiń ortaq úıimiz» naýqany aıasynda komýnaldyq qyzmetter men merdigerlik uıymdar baǵdarsham obektilerin, aıaldama pavılondaryn, jol belgileri men qalanyń kóshe-jol jelisiniń basqa da ınfraqurylymyn tazalaý, jýý men jóndeý jumystaryn júrgizedi.
Osylaısha bir aı ishinde Almaty Qalalyq mobıldilik basqarmasy men aýdan ákimdikteri 480 baǵdarsham, 1 765 aıaldama pavılonyn retke keltirip, 300 myń sharshy metr jolǵa jóndeý jumystaryn júrgizedi.
Qala qurylysyn baqylaý jáne qurylys basqarmalary obektilerdi qurylys alańdarynyń normalaryna sáıkes keltirý, atap aıtqanda abattandyrý qaǵıdalary men sanıtarlyq normalardy saqtaý bóliginde jumys júrgizetin bolady.
«Almaty – bizdiń ortaq úıimiz» naýqany týraly barlyq aqparat almaty.kz saıtynda, Almaty ákimdiginiń áleýmettik jelilerinde ornalastyrylǵan. Sondaı-aq, veb-saıtqa qala boıynsha bannerlerde, plakattarda arnaıy ornalastyrylǵan QR-kod arqyly da kirýge bolady.
Áleýmettik medıa naýqanynyń belsendi qatysýshylaryna arnalǵan heshtegter:
#AlmatyNashObshııDom, #NasMnogoGorodOdın, #AlmatyBizdińOrtaqÚıimiz, #BizKóppizQalajalǵyz.
