Almaty qalalyq mobıldilik basqarmasynyń basshysy Saǵyndyq Telibaev qala avtobýstarynda júrgizýshi otyratyn jer qorshalatyn bolatynyn aıtty, dep habarlaıdy Dalanews.kz.
“Dabyl túımesine keler bolsaq, bizge usynys tústi. Qazir tehnıkalyq múmkindikter qarastyrylyp jatyr, eger bolashaqta muny jasaýǵa múmkindik bolsa, árıne, iske asyramyz. Bul másele áli de talqylanýda. Sondaı-aq qazir jańa avtobýstar satyp alynyp jatyr, júrgizýshi men jolaýshy arasyna qalqa ornatýdy josparlap otyrmyz” - dedi ol.
Eske salaıyq, 2023 jyly jeltoqsan aıynyń sońynda avtobýs bir top adamdy qaqqan edi. Polısıanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan.
Oqıǵa barysynda 7 adam zardap shekti. Jedel medısınalyq qyzmet kelgenshe úsheýi qaıtys boldy.
