Polısıanyń málim etkenindeı shekarany kesip ótý kezinde 1970 jyly týǵan S.Sh.Ahmetov ustalǵan. Ol 2013 jyldyń jazynan beri asa aýyr qylmys jasaǵany úshin halyqaralyq izdeýde bolǵanyn aıta ketý kerek.
Ustalǵan azamat Samarqan Ahmetov deıtin "qylmys áleminiń avtorıteti" bolyp shyqty.
Qylmys áleminde "Samar" laqap atymen tanylǵan Ahmetov 2012 jyly "crime boss" (vor v zakone) ataǵyn alǵan. Oral qalasynda ómirge kelgen Ahmetovty "ulyqtaý" rásimi Kıprda ótken. Osy rásimde oǵan Qazaqstandaǵy ury-qarylardyń "kýratory" ataǵy qosa berilgen.
Sol jyldary Batys Qazaqstannyń İshki ister departamentiniń basshylyǵy Samar esimdi azamat týraly polısıanyń habardar ekenin aıtqan bolatyn.
Ustalǵan adam Almaty qalasynyń ýaqytsha ustaý ızolátoryna qamaldy. Tergeý amaldary bastalyp ketti.
2014 jyly Almatyda Qazaqstannyń túzeý mekemelerindegi astyrtyn oıynhanalardan Samarqan Ahmetovke "qor" jınaǵan tórt qazaqstandyq uzaq merzimge sottalǵan.
Olardyń arasynda Almaly aýdandyq soty 5,2 jylǵa bas bostandyǵynan aıyrǵan Samarqan Ahmetovtyń inisi de bar-tyn.
Qylmystyq is materıaldarynda Shyǵys Qazaqstan oblysy Shýaq aýylyndaǵy jáne Almatydaǵy tergeý ızolátorynyń aty atalǵan. Eki jaǵdaıda da sottalǵandar qumar oıynǵa tartylǵan. Kazınonyń kesirinen qaryzǵa batqan tutqyndardyń bereshegin týǵan-týystary ótep berýge májbúr bolǵan. Bul aqshanyń barlyǵy "ortaq qorǵa" jınalyp, keıinnen Arab ámirligindegi "Samardyń" esep-shotyna aýdarylǵan.
