پوليسيانىڭ ءمالىم ەتكەنىندەي شەكارانى كەسىپ ءوتۋ كەزىندە 1970 جىلى تۋعان س.ش.احمەتوۆ ۇستالعان. ول 2013 جىلدىڭ جازىنان بەرى اسا اۋىر قىلمىس جاساعانى ءۇشىن حالىقارالىق ىزدەۋدە بولعانىن ايتا كەتۋ كەرەك.
ۇستالعان ازامات سامارقان احمەتوۆ دەيتىن "قىلمىس الەمىنىڭ اۆتوريتەتى" بولىپ شىقتى.
قىلمىس الەمىندە "سامار" لاقاپ اتىمەن تانىلعان احمەتوۆ 2012 جىلى "crime boss" (ۆور ۆ زاكونە) اتاعىن العان. ورال قالاسىندا ومىرگە كەلگەن احمەتوۆتى "ۇلىقتاۋ" ءراسىمى كيپردا وتكەن. وسى راسىمدە وعان قازاقستانداعى ۇرى-قارىلاردىڭ "كۋراتورى" اتاعى قوسا بەرىلگەن.
سول جىلدارى باتىس قازاقستاننىڭ ىشكى ىستەر دەپارتامەنتىنىڭ باسشىلىعى سامار ەسىمدى ازامات تۋرالى پوليسيانىڭ حاباردار ەكەنىن ايتقان بولاتىن.
ۇستالعان ادام الماتى قالاسىنىڭ ۋاقىتشا ۇستاۋ يزولياتورىنا قامالدى. تەرگەۋ امالدارى باستالىپ كەتتى.
2014 جىلى الماتىدا قازاقستاننىڭ تۇزەۋ مەكەمەلەرىندەگى استىرتىن ويىنحانالاردان سامارقان احمەتوۆكە "قور" جيناعان ءتورت قازاقستاندىق ۇزاق مەرزىمگە سوتتالعان.
ولاردىڭ اراسىندا المالى اۋداندىق سوتى 5،2 جىلعا باس بوستاندىعىنان ايىرعان سامارقان احمەتوۆتىڭ ءىنىسى دە بار-تىن.
قىلمىستىق ءىس ماتەريالدارىندا شىعىس قازاقستان وبلىسى شۋاق اۋىلىنداعى جانە الماتىداعى تەرگەۋ يزولياتورىنىڭ اتى اتالعان. ەكى جاعدايدا دا سوتتالعاندار قۇمار ويىنعا تارتىلعان. كازينونىڭ كەسىرىنەن قارىزعا باتقان تۇتقىنداردىڭ بەرەشەگىن تۋعان-تۋىستارى وتەپ بەرۋگە ءماجبۇر بولعان. بۇل اقشانىڭ بارلىعى "ورتاق قورعا" جينالىپ، كەيىننەن اراب امىرلىگىندەگى "ساماردىڭ" ەسەپ-شوتىنا اۋدارىلعان.
