Almaty ákimi Darhan Satybaldy jaýapty basqarmalar basshylarymen keńes ótkizip, onda qurylys jumystarynyń sapasy, abattandyrý, qys maýsymyna daiyndyq jáne qala kóshelerindegi jol qazýdyń jai-kúiin talqylady, dep habarlaidy Dalanews.kz.
Almatyda jyl basynan beri qurylys nysandary 886 ret tekserilip, 486 zańbuzýshylyq anyqtaldy. Olardy joiý úshin 390 nusqama berildi. Baqylaý qorytyndysy boiynsha 301 qurylys litsenziiasy joiylyp, taǵy 23-i toqtatyldy. Sapasyz jumys pen erejeni buzǵany úshin 58 merdiger uiym, 7 tehnikalyq qadaǵalaý kompaniiasy jáne 43 jobalaý firmasy jaýapqa tartyldy.
Ákim zańsyz salynǵan nysandarǵa da nazar aýdardy: sotqa 68 talap aryz, sonyń ishinde 35-i — súrýge jiberildi. 2025 jyly 33 nysan buzyldy.
Qazirgi tańda Almatyda 227 nysanda injenerlik jeliler tóseý jáne jańartý jumystary júrip jatyr. Onyń ishinde 200 nysan jyl sońyna deiin aiaqtalýǵa tiis. Alaida 21 nysan boiynsha belgilengen merzim buzylýy yqtimal. Olardyń qatarynda «Almaty Sý», «Almaty jylý jelileri», «Alataý Jaryq Kompaniiasy» jáne birqatar aýdan ákimdikteriniń jobalary bar.
Ákim uzaq ýaqyt qazylyp jatqan jerlerdiń turǵyndarǵa qolaisyzdyq týǵyzatynyn aityp, transheialardy qorshaýsyz qaldyrýǵa, kóshelerdi qoqys pen topyraqqa toltyrýǵa jáne asfaltty sapasyz tóseýge bolmaitynyn qadap aitty.
Sonymen qatar joldy ortasha jóndeý kezinde asfalttyń juqa tóselýi, jiektastardyń durys ornatylmaýy jáne negizdi tazalamai jabyn tóseý siiaqty kemshilikter anyqtalǵan.
Qala qurylysy jáne sáýlet basqarmasy qalanyń joǵarǵy bóliginde berilgen sáýlet-josparlaý tapsyrmasy men qurylysqa ruqsattar sany 35%-ǵa azaiǵanyn málimdedi. Memleket basshysynyń tapsyrmasymen taý bókterinde qurylys júrgizýge ruqsat berýge moratorii engizildi. 10 qarashaǵa deiin Qurylys erejelerine ózgerister engizý aiaqtalady, al 2026 jyly mamyrǵa deiin Bas jospar túzetiledi.
Qysqy maýsymǵa 993 arnaiy tehnika daiyndalǵan, qosymsha 66 jańa mashina satyp alý josparlanǵan. Búginde 56 myń tonna qospa daiyndaldy. 15 qazanǵa deiin bul kórsetkish 100%-ǵa jetkiziledi. Alǵashqy qar eritetin pýnkt iske qosyldy, taǵy ekeýi biyl salynady.
Darhan Satybaldy qazylǵan joldardy qalpyna keltirýge baqylaýdy kúsheitýdi, merdigerlerdi jaýapqa tartýdy, ásirese, «Almaty Sý» jáne basqa kommýnaldyq qyzmetterdiń jumysyna erekshe nazar aýdarýdy tapsyrdy. Sondai-aq, jyl sońyna deiin bekitilgen merziminen keshigip jatqan nysandardy aiaqtaý, taý bókterindegi qurylysqa baqylaýdy kúsheitý, Bas jospardy ýaqytyly túzetý, qala qysqa tolyq daiyn bolýy úshin arnaiy tehnika men reagentterdi belgilengen merzimde satyp alýdy mindettedi.
Ákim qurylys pen abattandyrý sapasy turǵyndardyń jaily ómir súrýine tikelei áser etetinin atap ótti.
«Joldy uzaq ýaqyt qazyp tastaýǵa bolmaidy. Árbir merdiger men tapsyrys berýshi jumysyna jaýapty. Qala qysqa daiyn bolyp, turǵyndardyń qaýipsizdigin qamtamasyz etýi kerek», — dedi ákim.
