Almaty ákimdigi biyl shildede alǵashqy kómek qobdishasyn konkýrs arqyly satyp alǵan. Alaida satyp alýdyń zańdylyǵy kúmán týdyrady. Quramynda dárilik zattary bar taýarlardy jetkizetin qyzmet kórsetýshiniń arnaiy meditsinalyq litsenziiasy bolýy kerek. Al bul talaptyń saqtalǵany týraly aqparat belgisiz. Dalanews.kz memlekettik satyp alý portalynda jariialanǵan qujattarǵa nazar aýdardy.
Lot quramynda validol, tsitramon, analgin, iod, valeriana, ammiak eritindisi sekildi dárilik zattar, sondai-aq, meditsinalyq maqsattaǵy buiymdar bar. Qazaqstan zańnamasyna sáikes, mundai ónimder tek arnaiy litsenziiasy bar meditsinalyq uiymdar nemese tiisti ruqsaty bar jeke kásipkerler arqyly satylady.
Alaida lotty utqan tulǵanyń mundai qyzmetpen ainalysýǵa litsenziiasy bar-joǵy belgisiz. Ashyq derekkózderde onyń dárilik zattardy jáne meditsinalyq buiymdardy ainalymǵa engizýge ruqsat beretin qujaty týraly aqparat kórsetilmegen.
Osyǵan bailanysty mańyzdy suraqtar týyndaidy. Birinshiden, dári-dármek jetkizgen tulǵada tiisti meditsinalyq litsenziia boldy ma?
Eger litsenziiasy joq bolsa, ákimdik tarapynan jasalǵan shart zań talaptaryna sáikes kelmeidi. Sebebi dárilik zattardy jetkizý litsenziiasy bar uiymdar arqyly júzege asady.
Ekinshiden, ákimdik qyzmetkeri qol qoiǵan qujat qanshalyqty zańdy? Eger jetkizýshi litsenziia talaptaryna sáikes kelmese, qol qoiylǵan kelisimsharttyń ózi kúmán týdyrady. Mundai jaǵdaida satyp alý nátijesi jaramsyz dep tanylýy qajet.
Kelisimshartqa qol qoiǵan memlekettik qyzmetkerdiń áreketi zań buzýshylyq retinde qaralýy múmkin.
Dalanews.kz bul jaǵdaidyń anyq-qanyǵyn bilý úshin Densaýlyq saqtaý ministrliginiń Meditsinalyq jáne farmatsevtikalyq baqylaý komiteti departamentine resmi suraý joldady.
