Qoǵam belsendisi Bıbinur Sheralıeva Facebook jelisindegi paraqshasynda bastamashyl toptyń mıtıń ótkizýge ákimdikten ruqsat alǵanyn jazǵan, dep habarlaıdy Dalanews.kz.
"Biz Almaty qalasynyń ákimdigine 7 naýryz kúni M.Gandı saıabaǵynda "Áıelderdiń laıyqty ómiri úshin. Za dostoınýıý jızn jenshın!" taqyrybynda mıtıń ótkizýge habarlama bergen bolatynbyz. Bizdiń bergen habarlamaǵa ákimdik tarapynan ruqsat berildi", - deıdi qoǵam belsendisi.
Osy tusta ol sherýde áıelderge baılanysty ózekti taqyryptar qozǵalatynyn atap ótti.
"Osyǵan baılanysty sizderdi 7 naýryz kúni saǵat 12:00-de M.Gandı saıabaǵynda ótetin is-sharaǵa qatysýǵa shaqyramyn. Mıtıń barysynda qoǵamdaǵy áıelderdiń ózekti máseleleri kóteriledi. Sonymen qatar áıelderdiń laıyqty ómiri úshin qajetti talaptar aıtylady", - dedi Sheralıeva.
