Qazaqstandyq Allur avtokólik kompanıasynda jas qyzmetkerlerdiń bastamalary naqty qoldaý taýyp, júzege asyp keledi. Jastardy bıznes jáne áleýmettik jobalarǵa tartýǵa baǵyttalǵan Allur Zhastary baǵdarlamasy aıasynda volonterlik qozǵalys qurýdy usynyldy. Kompanıa basshylyǵy bul bastamany qoldap, nátıjesinde jumysshy jastardy qoǵam damýyna naqty úles qosýǵa biriktiretin «Eńbek Jastary» qozǵalysy paıda boldy, dep habarlaıdy Dalanews.kz.
Bul ıdeıa birtindep qalyptasyp otyr. Allur jas mamandary birneshe jyldan beri óz bastamalarymen senbilik uıymdastyryp, oqýshylarǵa jumysshy mamandyqtar týraly aıtyp, jergilikti ekologıalyq aksıalarǵa qatysyp kelgen. Búginde bul bastamalar jańa deńgeıge kóterilip, «Eńbek Jastary» atty biryńǵaı aýqymdy platformaǵa biriktirildi.
Qozǵalystyń iske qosylýy Qazaqstanda volonterliktiń qoǵamdyq ınstıtýt retindegi róli kúsheıip kele jatqan kezeńmen tuspa-tus kelip otyr. Bul baǵyt el damýynyń konstıtýsıalyq logıkasynda da kórinis tabady. Iaǵnı azamattardyń yntymaqtastyqqa, ózara kómekke jáne azamattardyń mańyzdy mindetterdi sheshýge belsendi qatysýyna basymdyq beriledi.
Bastama Memleket basshysy Qasym-Jomart Toqaev atap ótken eńbekke qurmet, azamattyq belsendilik jáne ár azamattyń el damýyna qosatyn jeke úlesiniń mańyzdylyǵy jónindegi ustanymdarmen úndes. «Eńbek Jastary» «Taza Qazaqstan» qundylyqtarymen sabaqtasady – taza orta, sanaly azamat, naqty is. Sonymen qatar halyqaralyq kontekstide de mańyzǵa ıe: Qazaqstannyń bastamasymen BUU 2026 jyldy Volonterlik jyly dep jarıalady, bul azamattyq belsendilik pen ózara kómek mádenıetiniń ózektiligin aıqyndaıdy.
Búgingi tańda qozǵalys Allur jáne Agromash óndiristik kásiporyndarynyń jumysshy jáne ınjenerlik mamandyq ıelerin qosa alǵanda shamamen 300 adamdy biriktirip otyr. Aldaǵy ýaqytta bul bastama atalǵan qundylyqtardy bólisetin jańa qatysýshylarmen tolyǵady.
Qozǵalys aıasynda alǵashqy bastama retinde Qostanaı oblysyndaǵy Amanqaraǵaı aýylynda jappaı orman órtinen zardap shekken aýmaqta aǵash otyrǵyzý aksıasy jarıalandy. Jobany júzege asyrý úshin «Eńbek Jastary» qatysýshylary bir kúndik jalaqylaryn baǵyttaıdy. Osylaısha qozǵalys alǵashqy qadamdarynan bastap naqty áreket formatyn qalyptastyryp otyr: jeke úles – naqty is. Bul týraly qozǵalys músheleri atap ótti.
«Biz syrttaı baqylaýshy bolǵymyz kelmeıdi. Bul – bizdiń óńirimiz, sondyqtan onyń damýyna ózimizdiń qatysqanymyz mańyzdy. Naqty, qolymyzdan keletin dúnıelerden bastaımyz. Jospar kóp. Basshylyqtyń jumys ýaqytynan tys bastamalarymyzdy qoldaýǵa daıyn ekendegi bizge úlken serpin berdi. Endi odan da kóp is jasaýǵa ynta paıda boldy. Ekologıalyq jobalar, qoǵamdyq keńistikterdi damytý boıynsha ıdeıalarymyz bar. Sonymen qatar oqýshylarmen jumysty jalǵastyryp, jumysshy mamandyqtardyń qundylyǵyn nasıhattaımyz. Endi buǵan kóbirek balany qamtı alamyz», – dedi Allur zaýytynyń mashına-kontaktili dánekerleý ýchaskesiniń dánekerleýshisi Dıas Berikov
«Eńbek jastary» qozǵalysynyń Qostanaıdan bastaý alýy kezdeısoq emes. Bul – eldiń mańyzdy ındýstrıalyq ortalyqtarynyń biri. Dál osy jerden jańa baǵyt qalyptasyp otyr: eńbek - sanaly tańdaý, al qoǵam ıgiligi úshin eńbek etý – jańa býynnyń qalypty qundylyǵyna aınalýda.
«Biz zaýyt qyzmetkerimiz. Osynda óstik, osynda jumys istep kelemiz. Tek resmı jumyspen shektelmeı, qoǵamǵa ortaq úlken dúnıe jasaǵymyz keledi. Adamnyń tabıǵaty solaı ǵoı: qolyńnan is kelse, ony qajet jerge qoldanǵyń keledi. Biz ózimizdi «volonter» dep shektemeımiz. Eń aldymen eńbek adamymyz, biraq eńbekti basqa qyrynan da kórsetýge bolady dep sheshtik. Al basshylyq bizdi qoldady», – dedi Agromash zaýytynyń personaldy basqarý jáne memlekettik organdarmen ózara is-qımyl bóliminiń bas mamany Tomırıs Seksenbaeva.
Qozǵalystyń jeke baǵyty retinde jumysshy mamandyqtardyń bedelin arttyrý kózdelip otyr. Bul – oqýshylarmen tikeleı kezdesýler, óndiris oryndaryndaǵy ashyq esik kúnderi jáne zamanaýı zaýyttardyń shynaıy beınesin kórsetetin medıakontent arqyly júzege aspaq. «Eńbek Jastary» ókilderiniń pikirinshe, eńbektiń bedeli uranmen emes, naqty úlgimen qalyptasady.
«Eńbek Jastary» qozǵalysy uzaq merzimdi bastama retinde qarastyrylyp otyr. Onyń maqsaty – jumysshy jastar arasynda tájirıbelik qatysý mádenıetin jáne áleýmettik jaýapkershilikti damytý. Qatysýshylar jobanyń bir rettik aksıa emes ekenin, ol jańa baǵyttarmen keńeıip, óńir kásiporyndary qyzmetkerleriniń qatysýymen ári qaraı damıtynyn atap ótedi.
