قازاقستاندىق Allur اۆتوكولىك كومپانياسىندا جاس قىزمەتكەرلەردىڭ باستامالارى ناقتى قولداۋ تاۋىپ، جۇزەگە اسىپ كەلەدى. جاستاردى بيزنەس جانە الەۋمەتتىك جوبالارعا تارتۋعا باعىتتالعان Allur Zhastary باعدارلاماسى اياسىندا ۆولونتەرلىك قوزعالىس قۇرۋدى ۇسىنىلدى. كومپانيا باسشىلىعى بۇل باستامانى قولداپ، ناتيجەسىندە جۇمىسشى جاستاردى قوعام دامۋىنا ناقتى ۇلەس قوسۋعا بىرىكتىرەتىن «ەڭبەك جاستارى» قوزعالىسى پايدا بولدى، دەپ حابارلايدى Dalanews.kz.
بۇل يدەيا بىرتىندەپ قالىپتاسىپ وتىر. Allur جاس ماماندارى بىرنەشە جىلدان بەرى ءوز باستامالارىمەن سەنبىلىك ۇيىمداستىرىپ، وقۋشىلارعا جۇمىسشى ماماندىقتار تۋرالى ايتىپ، جەرگىلىكتى ەكولوگيالىق اكسيالارعا قاتىسىپ كەلگەن. بۇگىندە بۇل باستامالار جاڭا دەڭگەيگە كوتەرىلىپ، «ەڭبەك جاستارى» اتتى ءبىرىڭعاي اۋقىمدى پلاتفورماعا بىرىكتىرىلدى.
قوزعالىستىڭ ىسكە قوسىلۋى قازاقستاندا ۆولونتەرلىكتىڭ قوعامدىق ينستيتۋت رەتىندەگى ءرولى كۇشەيىپ كەلە جاتقان كەزەڭمەن تۇسپا-تۇس كەلىپ وتىر. بۇل باعىت ەل دامۋىنىڭ كونستيتۋسيالىق لوگيكاسىندا دا كورىنىس تابادى. ياعني ازاماتتاردىڭ ىنتىماقتاستىققا، ءوزارا كومەككە جانە ازاماتتاردىڭ ماڭىزدى مىندەتتەردى شەشۋگە بەلسەندى قاتىسۋىنا باسىمدىق بەرىلەدى.
باستاما مەملەكەت باسشىسى قاسىم-جومارت توقايەۆ اتاپ وتكەن ەڭبەككە قۇرمەت، ازاماتتىق بەلسەندىلىك جانە ءار ازاماتتىڭ ەل دامۋىنا قوساتىن جەكە ۇلەسىنىڭ ماڭىزدىلىعى جونىندەگى ۇستانىمدارمەن ۇندەس. «ەڭبەك جاستارى» «تازا قازاقستان» قۇندىلىقتارىمەن ساباقتاسادى – تازا ورتا، سانالى ازامات، ناقتى ءىس. سونىمەن قاتار حالىقارالىق كونتەكستىدە دە ماڭىزعا يە: قازاقستاننىڭ باستاماسىمەن بۇۇ 2026 جىلدى ۆولونتەرلىك جىلى دەپ جاريالادى، بۇل ازاماتتىق بەلسەندىلىك پەن ءوزارا كومەك مادەنيەتىنىڭ وزەكتىلىگىن ايقىندايدى.
بۇگىنگى تاڭدا قوزعالىس Allur جانە Agromash وندىرىستىك كاسىپورىندارىنىڭ جۇمىسشى جانە ينجەنەرلىك ماماندىق يەلەرىن قوسا العاندا شامامەن 300 ادامدى بىرىكتىرىپ وتىر. الداعى ۋاقىتتا بۇل باستاما اتالعان قۇندىلىقتاردى بولىسەتىن جاڭا قاتىسۋشىلارمەن تولىعادى.
قوزعالىس اياسىندا العاشقى باستاما رەتىندە قوستاناي وبلىسىنداعى امانقاراعاي اۋىلىندا جاپپاي ورمان ورتىنەن زارداپ شەككەن اۋماقتا اعاش وتىرعىزۋ اكسياسى جاريالاندى. جوبانى جۇزەگە اسىرۋ ءۇشىن «ەڭبەك جاستارى» قاتىسۋشىلارى ءبىر كۇندىك جالاقىلارىن باعىتتايدى. وسىلايشا قوزعالىس العاشقى قادامدارىنان باستاپ ناقتى ارەكەت فورماتىن قالىپتاستىرىپ وتىر: جەكە ۇلەس – ناقتى ءىس. بۇل تۋرالى قوزعالىس مۇشەلەرى اتاپ ءوتتى.
«ءبىز سىرتتاي باقىلاۋشى بولعىمىز كەلمەيدى. بۇل – ءبىزدىڭ ءوڭىرىمىز، سوندىقتان ونىڭ دامۋىنا ءوزىمىزدىڭ قاتىسقانىمىز ماڭىزدى. ناقتى، قولىمىزدان كەلەتىن دۇنيەلەردەن باستايمىز. جوسپار كوپ. باسشىلىقتىڭ جۇمىس ۋاقىتىنان تىس باستامالارىمىزدى قولداۋعا دايىن ەكەندەگى بىزگە ۇلكەن سەرپىن بەردى. ەندى ودان دا كوپ ءىس جاساۋعا ىنتا پايدا بولدى. ەكولوگيالىق جوبالار، قوعامدىق كەڭىستىكتەردى دامىتۋ بويىنشا يدەيالارىمىز بار. سونىمەن قاتار وقۋشىلارمەن جۇمىستى جالعاستىرىپ، جۇمىسشى ماماندىقتاردىڭ قۇندىلىعىن ناسيحاتتايمىز. ەندى بۇعان كوبىرەك بالانى قامتي الامىز»، – دەدى Allur زاۋىتىنىڭ ماشينا-كونتاكتىلى دانەكەرلەۋ ۋچاسكەسىنىڭ دانەكەرلەۋشىسى دياس بەرىكوۆ
«ەڭبەك جاستارى» قوزعالىسىنىڭ قوستانايدان باستاۋ الۋى كەزدەيسوق ەمەس. بۇل – ەلدىڭ ماڭىزدى يندۋستريالىق ورتالىقتارىنىڭ ءبىرى. ءدال وسى جەردەن جاڭا باعىت قالىپتاسىپ وتىر: ەڭبەك - سانالى تاڭداۋ، ال قوعام يگىلىگى ءۇشىن ەڭبەك ەتۋ – جاڭا بۋىننىڭ قالىپتى قۇندىلىعىنا اينالۋدا.
«ءبىز زاۋىت قىزمەتكەرىمىز. وسىندا وستىك، وسىندا جۇمىس ىستەپ كەلەمىز. تەك رەسمي جۇمىسپەن شەكتەلمەي، قوعامعا ورتاق ۇلكەن دۇنيە جاساعىمىز كەلەدى. ادامنىڭ تابيعاتى سولاي عوي: قولىڭنان ءىس كەلسە، ونى قاجەت جەرگە قولدانعىڭ كەلەدى. ءبىز ءوزىمىزدى «ۆولونتەر» دەپ شەكتەمەيمىز. ەڭ الدىمەن ەڭبەك ادامىمىز، ءبىراق ەڭبەكتى باسقا قىرىنان دا كورسەتۋگە بولادى دەپ شەشتىك. ال باسشىلىق ءبىزدى قولدادى»، – دەدى Agromash زاۋىتىنىڭ پەرسونالدى باسقارۋ جانە مەملەكەتتىك ورگاندارمەن ءوزارا ءىس-قيمىل ءبولىمىنىڭ باس مامانى توميريس سەكسەنبايەۆا.
قوزعالىستىڭ جەكە باعىتى رەتىندە جۇمىسشى ماماندىقتاردىڭ بەدەلىن ارتتىرۋ كوزدەلىپ وتىر. بۇل – وقۋشىلارمەن تىكەلەي كەزدەسۋلەر، ءوندىرىس ورىندارىنداعى اشىق ەسىك كۇندەرى جانە زاماناۋي زاۋىتتاردىڭ شىنايى بەينەسىن كورسەتەتىن مەدياكونتەنت ارقىلى جۇزەگە اسپاق. «ەڭبەك جاستارى» وكىلدەرىنىڭ پىكىرىنشە، ەڭبەكتىڭ بەدەلى ۇرانمەن ەمەس، ناقتى ۇلگىمەن قالىپتاسادى.
«ەڭبەك جاستارى» قوزعالىسى ۇزاق مەرزىمدى باستاما رەتىندە قاراستىرىلىپ وتىر. ونىڭ ماقساتى – جۇمىسشى جاستار اراسىندا تاجىريبەلىك قاتىسۋ مادەنيەتىن جانە الەۋمەتتىك جاۋاپكەرشىلىكتى دامىتۋ. قاتىسۋشىلار جوبانىڭ ءبىر رەتتىك اكسيا ەمەس ەكەنىن، ول جاڭا باعىتتارمەن كەڭەيىپ، ءوڭىر كاسىپورىندارى قىزمەتكەرلەرىنىڭ قاتىسۋىمەن ءارى قاراي داميتىنىن اتاپ وتەدى.
