Tóreǵalı da sol sıaqty "tolmaǵan Toqtar, bolmaǵan Besbaevtyń" kebin kıgen keýdeli "naýbaıshy" bolǵan-aý, sirá?! Jelide jeldeı esip júrgen jazbalar men beınesújettiń álpeti sondaı oıǵa jeteleıdi. Ábúıir bolǵanda, Tóreshti qorǵashtaǵan jandármen jurtshylyq ta bar eken...
Biraq,
qalaı bolǵanda da, Tóreǵalıdyń aqsaqaldy konsertten qýyp shyǵýǵa qaqysy joq edi.
Áldebir narazylyǵyn bildirgen ol kisiniń jasy men basy tipten bólek áńgime. Eń bastysy - ol aqsaqal - tutynýshy: qaltasynan aqsha tólep, konsertke bılet alǵan adam. Tóreǵalı ol adamnyń zaldan shyǵýyn talap etetindeı, ony týǵan kúnine nemese qudalyǵyna shaqyrǵan joq.
Ol -
qoǵamdaǵy qyzmet túrin tutynýshy: shashtarazǵa, monshaǵa, tipti aqyly ájethanaǵa aqshasyn tólep baratyn adam sıaqty tutynýshy.
Al "tutynýshy talaby árdaıym durys" (pokýpatel - vsegda prav) degen jazylmaǵan qaǵıda bar. Osy turǵydan kelgende, tutynýshy sotqa júginýge qaqyly ("Tutynýshy talaby týraly" QR Zańynyń negizinde). Kópshiliktiń kózinshe konsertten qýylǵan, odan soń ınternet arqyly abyroıy tógilgen aqsaqaldyń "qulaǵyna - altyn syrǵa"...
Al bul skandaldyń moraldyq jaǵyna keler bolsaq, "besikten beli shyqpaǵan balany" áýeksitken kim eken? Qazaqtyń myńdaǵan jyldyq tarıhynan taǵlym alyp, oń men sol túısigin túgendep bolmaǵan "boqmuryndy" ulardaı shýlap, "uly dala balasy" etken kim? Qazaq radıosynyń qaptaǵan tilek aıtý baǵdarlamalarynan Tóreǵalıdyń ánin tyńdamasa, ishken asy boıyna batpaıtyn kimder edi?
Iá, kim ekenin ishteı sezip, dymyńyz quryp otyr, á?! Qazaqty sonaý Sopotqa áıgilegen Roza - kim, bul - kim? Dımashty aıtpaı-aq qoıalyq... Toı ánderimen taırańdaǵan Tóresh pe, taırańdatqan basqa ma?
Osy oraıda
...Osy oraıda arda arýaq Ózbekáli Jánibekov aǵam esime túsedi. 1980-shi jyldardyń basy. Óz-aǵańnyń QazSSR mádenıet mınıstriginde álde orynbasar, álde mınıstr bolyp júrgen kezi (naqty esimde joq).
Birde sol jyldary "Arlekınomen" álemge aty shyqqan Alla Pýgachevanyń Almatydaǵy Lenın atyndaǵy saraıda (qazirgi Respýblıka saraıy), umytpasam, eki konserti bir kúnde ótti.
Ekinshi konserttiń sońyna taman kórermenderdiń "bıs-bıs" qoshameti sharshatqan Alla Pýgachevanyń sahna syrtyndaǵy akýstıkalyq mıkrofonnyń qosýly turǵanyn ańdamaı: "Oh, kak nadoelı mne etı barany!" degen sózi estiledi. (Dál osy týraly shaǵyn maqalany "Vechernáá Alma-Ata" gazetiniń tigindisinen taýyp alýǵa bolady). Zaldyń aldyńǵy jaǵy gý etip baryp, bir basylady. Biraq grýzın men armánǵa qaraǵanda "tolerantty" qazaq konsertti sońyna deıin tyńdap qaıtady.
Erteńinde (álde sol túni) bir "baran" Pýgachıhanyń ol sózin mınıstrlikke jetkizedi. Ózaǵań QazTV-dan (álde Qazradıodan) konserttiń jazbasyn aldyryp, Allanyń aıtqan sózinen qulaǵdar bolady.
Mine, sol kúnnen bastap, Allanyń Qazaqstanǵa konsertpen kelý joly jabylady. Erteńinde SSSR Mádenıet Mınıstrligi men KPSS Ortalyq Komıtetiniń mádenıet bólimi bul jaǵdaıdan habardar bolady.
Sodan 1991-shi jylǵa deıin - Ózbekáli Jánibekov SK-nyń hatshylyǵynan pensıaǵa ketkenge deıin, Alla Qazaqstanǵa attap basa almady. Soıýzkonsert" birlestiginiń Qazaqstanǵa gastróldik baǵdarlamasynan Pýgacheva syzylyp tastalyp otyrdy. Syzyp tastaıtyn - baǵdarlamaǵa kelisim beretin QazSSR mádenıetmıni. Al syzyp tastaýdy qyzmetten ketkeninshe talap etken - Ózbekáli Jánibekov.
"Ultqa qyzmet qylý - minezden" -
Álıhan Bókeıhan.
Ermurat BAPI
