QR memleket jáne qoǵam qairatkeri, «Parasat», «Qurmet» ordenderiniń iegeri Orazgúl Asanǵazy "Parasat" podkastyna bergen suhbatynda Táýelsizdiktiń qazaq ultyna bergen basty qundylyqtary týraly sóz qozǵady, dep habarlaidy Dalanews.kz.
Onyń aitýynsha, táýelsizdik jyldary elde tek joldar men ǵimarattar salynyp qana qoiǵan joq, eń bastysy – qazaq halqynyń demografiialyq jáne rýhani ósimi aiqyn kórindi.
«Táýelsizdik qazaqqa ne berdi desek, biz óz elimizde, óz jerimizde 70 paiyzdan astyq. BUU qaýlysyna sáikes, eger bir memlekette bir ulttyń úlesi 62,3 paiyzdan assa, ol bir ultty memleket bolyp sanalady. Bul – Qazaqstan qazaqtyń eli degen sóz», – dedi ol.
Orazgúl Asanǵazynyń aitýynsha, balabaqsha men bastaýysh synyptarda qazaq tilinde oqityn balalardyń úlesi búginde 90 paiyzǵa jetken.
Qairatker til men rýhtyń ózara tyǵyz bailanysyna erekshe toqtaldy. Onyń pikirinshe, ana tilinde bilim alyp, tárbie kórgen balanyń rýhy biik bolady.
«Nelikten ózbekter qazir bizdi fýtboldan, bokstan jeńip ketip jatyr? Sebebi olar óz tilinde sóileidi. Til – rýh. Ana tilinde oilap, bilim alǵan ulttyń bolashaǵy berik bolady», – dedi ol.
Suhbat barysynda Orazgúl Asanǵazy qazaq tilinde bilim alyp, álemdik deńgeide jetistikke jetken tulǵalardy mysalǵa keltirdi. Sonyń biri – ánshi Dimash Qudaibergen.
«Dimash Aqtóbedegi qarapaiym qazaq mektebinde oqydy. Ol orys tilin orys synybynda oqyǵandardan kem bilmeidi, aǵylshyn tilin de erkin meńgergen. Biraq eń bastysy – ol óz ana tilin súiedi, sol tilde oilaidy, jazady, sóileidi jáne qazaq tilin álemge tanytyp júr», – dedi ol.
Sondai-aq ol álem moiyndaǵan matematik Asqar Jumadildaevtyń da Qyzylorda oblysynyń Shieli aýylynda qazaq tilinde bilim alǵanyn atap ótti.
Qoǵam qairatkeri sóz sońynda ata-analarǵa úndeý jasap, balanyń bolashaǵy ana tilinde bilim alýmen tikelei bailanysty ekenin jetkizdi.
«Alla ár ultqa óz tili men bolmysyn bergen. Alla bergen tilinde sóilep, oilap, jazatyn balanyń joly ashyq bolady. Men osyny ata-analarǵa túsindirgim keledi», – dep túiindedi Orazgúl Asanǵazy.
