Túrkistan qalasynyń aýdanaralyq soty ózin bloger ári qoǵamdyq belsendi retinde tanystyrǵan azamatqa qatysty qylmystyq isti qarap, ony bopsalaý boiynsha kináli dep tanydy, dep habarlaidy dalanews.kz.
Sot materialdaryna sáikes, Arys aýdanynda dárilik, tehnikalyq jáne aýyl sharýashylyǵy ósimdikterin ósirýmen, jinaýmen jáne eksporttaýmen ainalysatyn «Seiitbek áýleti» JShS qyzmetine qatysty 2025 jyldyń maýsymynda Facebook áleýmettik jelisinde jariialanymdar taratyla bastaǵan. Aiyptalýshy kásiporynda jumys istegen shetel azamattaryn videoǵa túsirip, olardyń qyzmeti týraly túrli materialdar jariialaǵan jáne kóshi-qon qyzmetine birneshe ret shaǵym túsirgen.
Is materialdary boiynsha, 2025 jyldyń shildesinde seriktestiktiń zańgeri retinde tanystyrylǵan jábirlenýshi jaǵdaidy retteý maqsatynda aiyptalýshymen kezdesip, oǵan demeýshilik kómek retinde 2 myń AQSh dollaryn bergen. Alaida sot dereginshe, budan keiin aiyptalýshy kásiporyn jumysyna kedergi keltirmeý úshin 5 million teńge talap etken.
Tergeý málimetine sáikes, talap oryndalmaǵan jaǵdaida ol áleýmettik jelilerde kásiporyn qyzmetine qatysty jaǵymsyz qoǵamdyq pikir qalyptastyrýǵa, memlekettik organdar arqyly ruqsat qujattarynyń kúshin joiýǵa jáne seriktestikte jumys istegen Ózbekstan azamattaryn elden shyǵartýǵa yqpal etetinin aitqan.
Kásiporyn qyzmetiniń toqtap qalýynan qaýiptengen jábirlenýshi talappen kelisip, 2025 jylǵy 12 tamyzda tanysy arqyly 500 myń teńge jáne 900 AQSh dollaryn bergen.
Sol kúni keshke Sairam aýdanyndaǵy «Family Garden» meiramhanasynda aiyptalýshy jábirlenýshiniń tanysy arqyly berilgen 6900 AQSh dollaryn alý kezinde politsiia qyzmetkerleriniń qolyna túsken.
Sot barysynda prokýror aiyptalýshyǵa 6 jyl 8 ai bas bostandyǵynan aiyrý jazasyn taǵaiyndaýdy surady. Aiyptalýshy óz kinásin moiyndamai, aqtaýdy talap etti. Al jábirlenýshi zańda kózdelgen jaza taǵaiyndaýdy suraǵan.
Sot onyń kinási jábirlenýshiniń, kýálardyń aiǵaqtarymen, saraptama qorytyndylarymen jáne qylmystyq is materialdarymen tolyq dáleldengenin atap ótti.
2026 jylǵy 26 mamyrdaǵy úkimmen aiyptalýshy Qylmystyq kodekstiń 194-baby 3-bóligi 2-tarmaǵy boiynsha kináli dep tanylyp, 6 jylǵa bas bostandyǵynan aiyryldy.
Úkim zańdy kúshine engen joq.
