"Altyn dombyra" iegeri Maqsat Aqanov aldaǵy alty aiǵa aitystan shettetildi. Bul týraly Aitys odaǵynyń tóraǵasy Amanjol Áltai málimdedi. Bul týraly Aitys odaǵynyń tóraǵasy Amanjol Áltai málimdedi, dep habarlaidy dalanews.kz.
Oqiǵa Mańǵystaý oblysyndaǵy Shaiyr aýylynyń 100 jyldyǵyna arnalǵan aitystan keiin qoǵam talqysyna tústi. Áleýmettik jelide taraǵan beinejazbada aqynnyń sózderi men sahnadaǵy áreketi synǵa alyndy. Jeli qoldanýshylary ony aitys ádebi men sahna mádenietine qaishy dep baǵalady.
Amanjol Áltaidyń aitýynsha, atalǵan aitys Aitys odaǵynyń josparyna kirmegen. Ony jergilikti azamattar jeke kásipkerlerdiń demeýshiligimen uiymdastyrǵan.
"Maqsat Aqanovty aldaǵy jarty jylda aitystarǵa qatystyrmaý jóninde sheshim qabyldandy. Shaiyr aýylynda oryn alǵan keleńsizdik bizdiń de qabyrǵamyzǵa batýda", – dedi Amanjol Áltai.
Odaq tóraǵasy bir aqynnyń áreketi úshin búkil aitysker qaýymdy kinálaýǵa bolmaitynyn atap ótti. Sondai-aq ózi uiymdastyratyn aitystarda aqyndardyń ádebi men sahna mádenietiniń saqtalýyna erekshe mán beriletinin jetkizdi.
Áleýmettik jelide taraǵan beinejazbaǵa Facebook belsendisi Nurgúl Hasanova pikir bildirip, aqynnyń áreketin synǵa aldy.
"Mynaý ne masqara, ne kórgensizdik! “Kúni keshe Shaiyr aýylynyń 100 jyldyǵynda bolǵan jaǵdai” deidi. WhatsApp arqyly kelip jatyr. “Aiaǵy las tórdi bylǵaidy, aýzy las eldi bylǵaidy” degen, aýzyna kelgenin kókip otyrǵan mynany jelkelep sahnadan qýyp shyǵatyn bir namysty adam bolmaǵany ma sol jerde?! Júz jerden “juldyz”, myń jerden “dúldúl” bolsa da! Mynaý ne basyný, ne tairańdaý?! Aitystyń ádebi, sahna mádenieti qaida?! Aitysty uiymdastyrýshylar men qazylar alqasy ne qarap otyr?! Eldi syilamaý, jerdi qorlaý, tutas halyqty adam qurly kórmei, ar-namysyn taptaý ǵoi bul!" – dep jazdy Nurgúl Hasanova.
Aita keteiik, Maqsat Aqanov - 2023 jylǵy "Altyn dombyra" respýblikalyq aitysynyń jeńimpazy. Sondai-aq 2025 jyly Semeide ótken "Adamzattyń Abaiy" respýblikalyq aitysynda bas júldeni ielengen.
