Májiliste Úkimetten memleketke qaitarylǵan aktivter qorynan halyqtyń osal toptaryna arnalǵan ipotekalyq nesielendirýge 50 mlrd teńge bólý suraldy. Óitkeni 2025-2027 jyldarǵa arnalǵan respýblikalyq biýdjette osy topqa arnalǵan "2-10-20" baǵdarlamasy sheńberinde nesie (zaim) berý úshin qarajat kózdelmegen. Bul týraly Berik Beisenǵaliev Úkimetke joldaǵan depýtattyq saýalynda aitty, dep habarlaidy Dalanews.kz.
Depýtattyń aitýynsha, qazirgi ýaqytta halyqtyń áleýmettik osal toptaryn turǵyn úimen qamtamasyz etý máselesi ózekti bolyp otyr.
"Áleýmettik osal sanattaǵy azamattar tabysynyń tómendiginen, olardyń turǵyn úi satyp alýyna qoljetimdi jalǵyz quraly "Otbasy bankiniń" 2%-ben beriletin jeńildetilgen ipotekasy ("2-10-20") bolyp tabylady. Alaida qazir bul baǵdarlama toqtap tur. Osyǵan bailanysty,2025 jylǵy 28 naýryzda meniń tóraǵalyǵymmen AMANAT partiiasy janyndaǵy Óńirlik damý jónindegi respýblikalyq keńestiń otyrysynda Qazaqstan Respýblikasynyń Úkimetine, sondai-aq Ulttyq ekonomika ministrligine Qarjy ministrligimen jáne basqa da múddeli memlekettik organdarmen birlesip, "2-10-20" jeńildikti ipotekalyq baǵdarlamasyna qatysýshylarǵa Qazaqstan Respýblikasy Bas prokýratýrasynyń Aktivterdi qaitarý komiteti tartqan qarajat esebinen qaryz berý úshin "Otbasy bank" aktsionerlik qoǵamyn 50 mlrd teńge kóleminde qarjylandyrý múmkindigin qarastyrý usynyldy", - deidi Beisenǵaliev.
Ol bul rette áleýmettik osal toptarǵa kredit berý úshin biýdjet qarajatynyń bolmaýyna bailanysty qaryzdar buryn qalyptasqan qaitarymdy qarajat esebinen ǵana beriletinin, olardyń kólemi óte shekteýli ekenin naqtylai ketti.
"Osyǵan bailanysty qazirgi ýaqytta "2-10-20" baǵdarlamasy boiynsha jańa obektilerdi maquldaý protsesi toqtatylǵan. Bul jaǵdai, ásirese Otbasy bankke turǵyn úi saiasatyn reformalaý jónindegi zań aiasynda ulttyq damý institýty mártebesi berilip jatqan kezde, áleýmettik shielenis týdyrýy múmkin", - deidi depýtat.
Mysaly, 2024 jyly respýblikalyq biýdjetten qarajat bólinbegen, al nesieler (zaimdar) 2023 jyly bólingen jáne tolyq igerilgen qarajat esebinen berilgen. 2025-2027 jyldarǵa arnalǵan respýblikalyq biýdjette de "2-10-20" baǵdarlamasy sheńberinde nesie (zaim) berý úshin qarajat kózdelmegen.
