Prezident tapsyrmalaryn iske asyrý aiasynda Qazaqstanda áleýmettik salada aýqymdy ózgerister júzege asyrylyp jatyr. Bul týraly Premer-ministr Oljas Bektenov málimdedi, dep habarlaidy Dalanews.kz.
Úkimet basshysynyń aitýynsha, sońǵy jyldary áleýmettik shyǵystar kólemi turaqty túrde joǵary deńgeide saqtalǵan. 2025 jyly bul maqsatqa respýblikalyq biýdjetten 9,3 trln teńge bólinip, jalpy shyǵystardyń 36,5%-yn quraǵan.
"Qoldaýdyń filosofiiasy ózgerdi: kómek ataýly, ádil ári yntalandyrýshy bolýy tiis. Tsifrlyq quraldar úi sharýashylyqtarynyń jaǵdaiyn dálirek baǵalaýǵa múmkindik berdi", - dedi Bektenov.
Sońǵy jyldary adam kapitalyna salynǵan investitsiia aitarlyqtai ósti: bilim men ǵylymdy qarjylandyrý bes eseden astam, densaýlyq saqtaý men áleýmettik qyzmetterge bólinetin qarjy 3,7 esege artqan.
Elde bilim berý infraqurylymy da keńeiip keledi. Jeti jylda 1,3 myńnan astam jańa mektep salynǵan. Tek "Keleshek mektepteri" ulttyq jobasy aiasynda 2023–2025 jyldary 217 mektep paidalanýǵa berilgen.
Muǵalimderdiń eńbekaqysyna qanaǵattaný deńgeii de artqan. TALIS-2024 zertteýine sáikes, Qazaqstan bul kórsetkish boiynsha álemdegi úzdik bestikke engen: 2018 jylǵy 39%-dan 2024 jyly 71%-ǵa deiin ósken.
Densaýlyq saqtaý salasynda da oń ózgerister bar. Eldegi meditsinalyq uiymdar sany 830-ǵa jetip, dárigerler sany 83 myńnan asqan. Qazaqstan ana ólimin azaitý qarqyny boiynsha álemdik ondyqqa kirgen.
Prezident bastamasymen 2021 jyly iske qosylǵan "Ańsaǵan sábi" baǵdarlamasy arqyly jyl saiyn 7 myń EKO kvotasy bólinedi. Baǵdarlama bastalǵaly 28 myń áiel múmkindik alyp, 11 myń sábi dúniege kelgen.
Mańyzdy bastamalardyń biri - "Ulttyq qor – balalarǵa" baǵdarlamasy. Onyń aiasynda barlyq qazaqstandyq balalardyń esepshotyna Ulttyq qordyń investitsiialyq tabysynan jyl saiyn qarajat túsip otyrady.
"Úsh jyl ishinde jeti million balaǵa 2,5 mlrd dollardan astam qarjy aýdaryldy", - dedi Úkimet basshysy.
Sonymen qatar "Qazaqstan balalary" biryńǵai baǵdarlamasy qabyldanyp, balalardyń quqyqtary men ál-aýqatyn qamtamasyz etetin barlyq sharalar bir júiege biriktirilgen.
Jalpy alǵanda, qabyldanǵan sharalardyń nátijesinde Qazaqstanda kútiletin ómir súrý uzaqtyǵy 76 jasqa deiin jetken.
