Energetıka mınıstri Erlan Aqkenjenov Úkimette ótken brıfıń barysynda «munaı baǵasyndaǵy aýytqý Qazaqstandaǵy benzınniń qunyna áser etýi múmkin be» degen suraqqa jaýap berdi, dep habarlaıdy Dalanews.kz.
Onyń aıtýynsha, ótkenge kóz júgirtsek, munaı baǵasynyń aýytqýy Qazaqstan ishindegi belgilengen baǵalarǵa áser etken emes.
"Búgingi tańda halyqaralyq naryqtaǵy baǵaǵa sáıkes túzetý júrgizý degen bizde joq. Munaı baǵasy qalaı ózgeredi jáne kúnine birneshe ret ózgeretinine qaramastan, benzın baǵasy tek ishki suranys pen usynyspen anyqtalady. Búgingi tańda elimizde Qazaqstannyń benzın men dızel otynyna degen qajettiligin qamtamasyz etetin úsh iri zaýyt jumys istep tur. Bizde tikeleı táýeldilik degen joq", - dedi Erlan Aqkenjenov.
Aıta ketsek, 2025 jyly 29 qańtardan bastap Qazaqstanda benzın men dızel otynynyń baǵasyna qatysty memlekettik retteýdiń kúshi joıylǵan.
