Álemdik konteinerlik tasymal salasyndaǵy iri kompaniialardyń biri – MSC toby Qazaqstanda strategiialyq seriktestik ornatatynyn málimdedi. Kompaniia otandyq SEMURG INVEST-pen birlesip jumys istemek. Bul týraly sarapshy Aibar Oljaev áleýmettik jelidegi paraqshasynda jazdy, dep habarlaidy dalanews.kz.
Sarapshynyń aitýynsha, atalǵan seriktestik Kaspii teńizindegi Quryq portynyń infraqurylymyn halyqaralyq tasymal jelisine qosýǵa múmkindik beredi.
«Álemdik konteiner tasymalynyń alyby MSC toby otandyq SEMURG INVEST-pen strategiialyq seriktestik quratynyn jariialady. Demek Kaspiidegi Quryq portyndaǵy infraqurylym halyqaralyq tasymal jelisine qosylady da Ortalyq Aziiadan Túrkiia men Eýropaǵa shyǵatyn baǵyttar tezirek damityn bolady. Sarzha Logistics platformasyn Qazaqstan, Ózbekstan, Qyrǵyzstan jáne Tájikstannyń konteinerlik júk aǵyndaryna qyzmet kórsetetin operator retinde qalyptastyrý kózdelgen», – deidi Aibar Oljaev.
Ekonomist bul kelisimniń mańyzyn túsindire kele, port salýmen ǵana jumys bitpeitinin atap ótti.
Onyń sózinshe, turaqty júk aǵynyn qamtamasyz etý, keme, poiyz jáne terminaldardyń jumysyn úilestirý, sondai-aq klientterge túsinikti tarif pen senimdi jetkizý merzimin usyný qajet.
«Port salý jumystyń bir bóligi ǵana. Endi oǵan turaqty júk ákelý, kemeniń, poiyzdyń jáne terminaldyń jumysyn úilestirý, klientke túsinikti tarif pen senimdi jetkizý merzimin usyný qajet. Halyqaralyq operator bizdiń Quryqty óziniń klientterimen jáne tasymal baǵyttarymen bailanystyra alady», – dep jazdy sarapshy.
Aibar Oljaevtyń málimetinshe, MSC quramyndaǵy MEDLOG jelisinde 470-ten astam logistikalyq nysan bar.
«MEDLOG jelisinde 470-ten astam logistikalyq nysan bar. Olar jylyna shamamen 10 million TEU óńdeidi. Al MSC jelisi 155 eldegi 520 portty qamtidy. Qazaqstandyq baǵyttar osy aýqymdy halyqaralyq júiege qosylaiyn dep tur», – deidi ol.
Sarapshynyń aitýynsha, Quryqtaǵy Sarzha Kaspii klasterin damytý aiasynda jylyna 5 million tonnaǵa deiin qosymsha júk óńdeý qýatyn qurý josparlanǵan. Onyń ishinde konteinerlik qýat 110 myń TEU-ǵa deiin jetýi tiis. Aibar Oljaev TEU uǵymy jiyrma fýttyq standartty teńiz konteinerin bildiretinin atap ótti.
Onyń pikirinshe, jańa seriktestik Qazaqstan arqyly ótetin halyqaralyq dálizderdiń tartymdylyǵyn arttyrady.
«Syrtqy naryqqa shyǵatyn balama joldyń bolýy tasymaldaýshyǵa Qazaqstan arqyly ótýdiń túrli joldaryn kóbeitedi. Endi Ózbekstan, Tájikstan, Qyrǵyzstan, Aýǵanstan men Túrkimenstan eksporterlerine Eýropaǵa Qazaqstan arqyly ótý anaǵurlym tez jáne ońai bolady. Al júkti tasymaldaý, saqtaý, tieý, jóneltý jumystary bizdiń bizneske tapsyrys ákeledi», – dedi sarapshy.
Aibar Oljaev bul seriktestiktiń ekonomikalyq mańyzy joǵary ekenin atap ótti.
«Sondyqtan bul seriktestiktiń mańyzy óte zor», – dep túiindedi ol.
