Álem jýrnalisteri Túrkistanda
Qazaqstannyń zamanaýi mádeni jetistikterin kórsetý jáne týrizminiń tartymdylyǵyn arttyrý maqsatynda 13 qyrkúiek kúni Túrkistan oblysyna sheteldiń jetekshi buqaralyq aqparat quraldarynyń ókilderi keldi.
QR Syrtqy ister ministrliginiń bastamasymen kelgen delegatsiia quramynda Ulybritaniia, Frantsiia, Qytai, Italiia, Koreia, Polsha, Indoneziia elderinen jýrnalister bar. Baspasóz týry elimizdiń týristik áleýetin jáne Túrkistan oblysymen qatar Qazaqstannyń bedelin nyǵaitýǵa yqpal etetini sózsiz.
Óńirdiń tynysymen jan-jaqty tanysýǵa kelgen 7 memlekettiń jýrnalisterin Túrkistan oblysynyń ákimi Janseiit Túimebaev qabyldady. Kezdesý barysynda óńir basshysy oblysty damytý jónindegi oilary men josparlaryn aitty.
– Sizdermen san ǵasyrlyq tarihy bar kieli Túrkictan jerinde kezdesip otyrmyz. Bul basqosýǵa arqaý bolyp otyrǵan Túrkistan qalasynyń qazaq halqynyń tarihynda orny erekshe. Túrkistan oblysy elimizde eń kóp týrist keletin aimaq sanalady. Bizdiń tańǵajaiyp tabiǵatymyz ben tarihi oryndarymyzdy kórýge keletinder qatary mol. Túrkistanda tarihi oryndar men eskertkishter, kóne qalalar kóp. Sonymen qatar, taýlar, kólder, ózender men kórikti oryndar da barshylyq. Uly Jibek Joly bizdiń oblysymyzdan ótken. Sizder de óz elderińizge barǵan kezde Túrkistan týraly aityp, óńir týrizmin nasihattaýǵa úles qosasyzdar degen oidamyn. Búgingi kezdesýde aitylǵan usynystar men pikirler «Túrkistan oblysynyń týristik potentsialyn damytý» baǵdarlamalyq tujyrymdamasyn júzege asyrýda zor yqpalyn tigizetinine senimdimin, – dedi Janseiit Qanseiituly.
Kezdesýde Polshanyń «Turystyka.rp.pl» agenttiginiń ókili Anna Klossovska jáne ózge de jýrnalister óz áserlerin aityp, óńir týraly suraqtar qoidy. Sapar aiasynda shetelden kelgen qonaqtar tarihy tereń Otyrar aýdanyna da bardy. Óz kezeginde aýdan ákimdigi jýrnalisterdi álemge áigili Otyrar qalasynyń tarihymen tanystyrdy. «Arystanbab» kesenesine aialdaǵan sheteldikter syryn ishine búkken kieli jerdiń mol murasyna qanyqty.
Munan keiin jýrnalister Túrkistan óńirin aralady. Buqaralyq aqparat quraldarynyń ókilderi Qoja Ahmet Iasaýi kesenesi, «Áziret Sultan» memlekettik tarihi-mádeni qoryǵy jáne Túrkistan qalasyndaǵy basqa rýhani jáne týristik oryndardy aralap, tarihymyzben tanysty. 2018 jyldyń birinshi jartyjyldyǵynda Túrkistan qalasyna kelýshiler sany 700 myńnan asyp, bul ótken jyldyń osy kezeńimen salystyrǵanda 60%-ǵa kóbeigen. Mádeniet jáne óner taqyryptary boiynsha mamandanǵan sheteldik jýrnalister Qoja Ahmet Iasaýi kesenesiniń qurylysyna, sán-saltanatyna erekshe qyzyǵýshylyq tanytty.
Sondai-aq, sheteldik qonaqtar Túrkistan qalasy mańyndaǵy maqta alqabyndaǵy aq altyndy jinaý sátine kýá boldy. Aita keteiik, biyl óńirdegi 132 myń gektar alqapqa maqta egilgen. Elimizdegi aq altyn ósirip, eksporttaityn birden-bir óńirdegi sharýashylyqtyń bul túri sheteldik jýrnalisterdiń qatty qyzyǵýshylyǵyn oiatty.Túrkistanda jýyrda qanat qaǵatyn biregei joba «Golden Samel Group LTD» túie sútin óńdeitin zaýytyna bardy. Táýligine 100 tonnaǵa deiin sút óńdep, 7 túrli energetikalyq sýsyn shyǵarýǵa múmkindigi bar kásiporynǵa salynǵan investitsiia kólemi 7 mlrd. 600 mln. teńgeni quraidy. Alpaýyt kásiporynnyń jumysy sheteldikterdiń qyzyǵýshylyǵyn týǵyzdy.
Túrkistan oblysynyń tańǵajaiyp tabiǵaty men tereń tarihyna qanyqqan qonaqtar baspasóz týrynyń joǵary dárejede ótkendigin aityp, alǵystaryn bildirdi.
Túrkistan oblysy ákiminiń baspasóz qyzmeti
