Májilis depýtaty Samat Nurtaza alaiaqqa 8 million teńgege aldanǵan 18 adamnyń aryzyn quqyq qorǵaý organdary qabyldamaǵanyn aitty, dep habarlaidy Dalanews.kz.
“Meniń qolyma 18 azamattyń qoly qoiylǵan ujymdyq aryz kelip tústi. Aryzda keltirilgen derekke sáikes, Alina Davletova degen adam alaiaqtyqqa kúdikti retinde kórsetilgen. Ol Instagram jáne WhatsApp jelileri arqyly “Treiding s nýlia” degen ataýmen offlain oqytý kýrsyn usynady”, – dedi depýtat.
Sózinshe, Davletova usynǵan kýrsqa qatysqysy kelgenderden 300 myńnan 550 myń teńgege deiin aqy jinalǵan. Jalpy soma 8 million teńgege jýyq. Tólemder bank kartasy arqyly, qolma-qol jáne bólip tóleý jolymen jasalǵan. Tipti keibir azamattar bul maqsatta nesie rásimdegen.
“Alaida qyzmet kórsetý týraly eshqandai shart jasalmaǵan. Ne oqý jospary, ne kýrsty kýálandyratyn sertifikat berilmegen. Atalǵan faktide zańnamada kózdelgen alaiaqtyq belgileri anyq baiqalady”, – dedi Samat Nurtaza.
Onyń aitýynsha, zardap shekken azamattar quqyq qorǵaý organdaryna júgingenimen, “is qozǵaýǵa negiz joq” degen sebeppen aryzdary tirkelmei qalǵan.
“Osylaisha, azamattardyń zań aiasynda óz quqyǵyn qorǵaý múmkindigi óreskel buzylýda. Bul — bir ǵana naqty mysal. Al el kóleminde osyndai qaptaǵan infa-syǵandardyń quryǵyna túsip, alaiaqtarǵa jem bolyp júrgen adamdar qanshama?”, – dedi depýtat.
Osyǵan bailanysty Samat Nurtaza Bas prokýratýraǵa eki usynys jasady:
- Birinshi. Kórsetilgen aryzdy qaita qarap, zańnamaǵa sáikes tolyqqandy quqyqtyq sharalar qoldaný.
- Ekinshi. Áleýmettik jeli arqyly túrli aqyly kýrs, trening, seminar, taǵy basqa qyzmet usynatyn azamattardy tolyq tekserip, zańǵa sai kelmegenderge naqty shara qabyldaý.
“Áleýmettik jeli arqyly qyzmet usynatyndardy zańmen retteitin ýaqyt áldeqashan jetti”, – dep túiindedi depýtat óz sózin.
