Bul sapardyń Teatr úshin tuńǵysh ret ekenin aita ketken jón. Teatrdyń kórkemdik jetekshisi – Juldyzbek Jumanbai.
«Alataý» dástúrli óner teatrynyń jańa formattaǵy qoiylymdaryna kórermender tánti bolyp, aq jarma tilekterin aityp, oi-pikirlerin ortaǵa saldy:
QR Mádeniet jáne sport vitse-ministri Nurqisa Dáýeshov: «Alataý» dástúrli óner teatrynyń Elordamyzdaǵy alǵashqy gastróldik sapary sátti boldy dep oilaimyn. Barsha jurtshylyqqa dástúrli ónerimizdi, mádenietimizdi joǵarǵy deńgeide kórsetti. Osyndai talanttar bar jerde bizdiń ónerimiz máńgilik bolady. Óner ieleriniń eńbekterin árqashan baǵalap, Memleket basshysymen qoldaý boiynsha jumystardy birge atqaramyz degen senimdemin. Teatr ujymyna óz atymnan sheksiz alǵysymdy aitamyn. Árqashan biikte bolaiyq!».
QR Parlamenti Májilisiniń depýtaty Erlan Sairov: «Qoiylym-kontsertten keremet áser aldym. Bizdiń salt-dástúrimizdiń, tól mádenietimizdiń jańa kórinisi. Eń aldymen osy ujymdy quttyqtaimyn. Ekinshiden, osy bir tyń baǵyttaǵy qoiylymdardy Qazaqstan boiynsha nasihattaý kerek. Tabystarǵa jete bersin, biz de kómektesýge daiynbyz jáne tilektespiz».
«Jastar» teatrynyń direktory, Memlekettik syilyqtyń iegeri Ádil Ahmetov: «Alataýdyń bókterinen, Almatydan kelgen «Alataý» dástúrli óner teatrynyń «Aiman-Sholpan» mýzykalyq komediiasyn tamashalap, bir rahattanyp qaldyq. Osy oraida Rinat Zaitov pen Juldyzbek Jumanbaidyń úlken erlikke barǵandaryna kýá boldym. Týra keshegi Jumat Shanin, Temirbek Júrgenovterdiń isterin atqaryp otyr. Óitkeni akterler bar, dástúrli ánshiler bar, bishiler bar, barlyǵyn biriktirip, ujym etip, bir dúnie qylyp shyǵarý úlken eńbek. Áriptesterime alǵysymdy bildiremin. Teatrdyń bolashaǵy zor. Qazaqstanda mundai ulttyq teatr máńgi ómir súredi. Bizdiń ónerimizdiń eń shyńynda turý kerek dep esepteimin. Sáttilik!».
M. Gorkii atyndaǵy memlekettik akademiialyq orys drama teatrynyń direktory Ernar Jumataev: «Búgingi «Aiman-Sholpan» mýzykalyq komediiasy óziniń ereksheligimen ótti. Elorda tórinde, «Jastar» teatrynda kórermenderdiń qýanyshtarynda shek joq. Rejisserdiń ózindik sheshimi bar. Akterlerden bólek, dástúrli ánshiler jáne t.b. qatysty. Teatrdyń alǵa qoiǵan maqsaty bar, ózindik stili bar. Qoǵammen bailanystyra otyryp, biraz aitar oiy boldy».
«A. I.» teatrynyń direktory, QR Eńbek sińirgen qairatkeri, ánshi, aktrisa Aigúl Imanbaeva: «Birinshiden, men «Alataý» dástúrli óner teatrynyń tilekshisimin, kórermenimin. Shynyn aitý kerek. Elordaǵa keldi degendi estip, jumysymdy tastai salyp keldim. Teatrdyń óziniń stilistikasyn qalyptastyryp kele jatqanyn búgin «Aiman-Sholpan» mýzykalyq komediiasynan kórdik. Bizdiń salt-sana, ádet-ǵuryp, qazaqtyń yrymy, qazaqtyń qanyna bitken qasietteri, tipti bala kúnimizde oinaǵan joǵalyp ketken oiyndarymyz, jalpy qazaqtyń bolmysy «Aiman-Sholpan» qoiylymynda qamtylǵan. «Aiman-Sholpan» burynnan qoiylyp keledi. Biraq qazirgi almaǵaiyp zamanda bul qoiylym jańasha baǵytta boldy».
Teatr jáne kino akteri, Qazaqstannyń eńbek sińirgen qairatkeri Dáýren Serǵazin: «Eń aldymen Alataý» dástúrli óner teatryn «Aiman-Sholpan» permerasymen quttyqtaimyn. Óziniń janrynda, ózindik baǵytynda qoiyldy. Óz maqsatyna óz deńgeiinde jetti dep oilaimyn. Kórermenderdiń kóńilderinen shyqty. Ystyq yqylastaryn alyp otyr. Mundai teatr elimizge kerek. Árqashanda qoldaimyz. Nasihattaimyz. Elimiz boiynsha aralasa eken degen tilegimiz bar. Bul teatrda kóp nárse jatyr. Bizdiń tarihymyz jatyr, ulttyq qundylyqtarymyz jatyr. Ujymdy quttyqtaimyn. Aq jol, sáttilik tileimin. Permeralar kóp bolsyn. Úlken-úlken merekelerde, festivalderde kezdese bereiik».
Aqyn Iranǵaiyp Kúzembaev: «Alataý» teatry keremet bir demalys syilady. Barlyǵyna rahmet. Ónerleri órge bassyn. Shyn máninde attaryna zattary sai bolyp, Aiman men Sholpannyń ózderin kórgendei boldyq. Kótibar bolsyn, qaisysyn alsaq ta ózderiniń sheberlikterin kórsetti. Oǵan kýá búgingi kórermenderdiń qoshemetteri. «Alataý» dástúrli óner teatry jasai bersin».
Qýanysh Jumabekuly,
«Alataý» dástúrli óner teatry Ádebiet bóliminiń meńgerýshisi
