Prezident Jetisý oblysynyń ákimi Beibit Isabaevty qabyldady, dep habarlaidy Dalanews.kz.
Qasym-Jomart Toqaevqa óńirdiń áleýmettik-ekonomikalyq damý qorytyndylary týraly esep berilip, aldaǵy kezeńge arnalǵan jospary tanystyryldy.
Oblys ákiminiń aitýynsha, biylǵy birinshi jartyjyldyqta óńirge 178 milliard teńge (ósim – 29,5 paiyz) investitsiia tartylǵan. 2025-2027 jyldarǵa arnalǵan investitsiialyq portfel jasaqtalyp, oǵan jalpy quny 2,6 trillion teńge bolatyn 128 joba engizildi. Olardyń aiasynda 10,6 myń jumys orny ashylady. Atap aitqanda, taý-ken baiytý kombinaty, «Qazaqstan – Qytai halyqaralyq ónerkásip qalasy» indýstrialdy parki, jel elektr stansalarynyń zaýyty, halyqaralyq áýejai salynady.
Memleket basshysyna agroónerkásip kesheniniń damýy týraly málimet berildi. Biyl oblysta 540 myń tonna qyzylsha jinaý jáne 78 myń tonna qant óndirý josparlanyp otyr.
Prezidentke óńirdiń kólik-logistikalyq jáne tranzittik áleýetiniń jai-kúii, infraqurylymdyq jobalardy iske asyrý, eldi mekenderdi gazben qamtamasyz etý, sondai-aq áleýmettik infraqurylymdardy salý jáne jóndeýden ótkizý týraly baiandaldy.
Kezdesýde týristik salaǵa basa nazar aýdaryldy. Beibit Isabaevtyń aitýynsha, Alakóldiń jaǵasyndaǵy infraqurylymdy jańǵyrtý jumystary jalǵasyp jatyr. Úsharal áýejaiynyń ushý-qoný jolaǵy jóndeýden ótken.
Óńirde káriz jáne elektr jelilerin jańartý jumystary jalǵasýda. Budan bólek, «Balqash» týristik-rekreatsiialyq aimaǵynyń bas jospary ázirlendi. Lepsi aýyly – Balqash kóli jaǵalaýy avtojoly rekonstrýktsiiadan ótip, injenerlik infraqurylym salý jobasy iske asyrylyp jatyr. Jyl sońyna deiin Almaty – Óskemen – Lepsi – Aqtoǵai avtojolynyń qurylysy aiaqtalady.
Qasym-Jomart Toqaev qant óndirisin odan ári damytýdyń, turǵyndardy kógildir otynmen qamtamasyz etýdiń, týristik infraqurylymdy jetildirýdiń jáne demalýshylarǵa qolaily jaǵdai jasaýdyń mańyzyna toqtaldy. Turǵyn úi-kommýnaldyq sharýashylyq jáne áleýmettik sala nysandarynyń aldaǵy jylytý maýsymyna daiyndyǵyn baqylaýda ustaýdy tapsyrdy.
