پرەزيدەنت جەتىسۋ وبلىسىنىڭ اكىمى بەيبىت يسابايەۆتى قابىلدادى، دەپ حابارلايدى Dalanews.kz.
قاسىم-جومارت توقايەۆقا ءوڭىردىڭ الەۋمەتتىك-ەكونوميكالىق دامۋ قورىتىندىلارى تۋرالى ەسەپ بەرىلىپ، الداعى كەزەڭگە ارنالعان جوسپارى تانىستىرىلدى.
وبلىس اكىمىنىڭ ايتۋىنشا، بيىلعى ءبىرىنشى جارتىجىلدىقتا وڭىرگە 178 ميلليارد تەڭگە (ءوسىم – 29،5 پايىز) ينۆەستيسيا تارتىلعان. 2025-2027 جىلدارعا ارنالعان ينۆەستيسيالىق پورتفەل جاساقتالىپ، وعان جالپى قۇنى 2،6 تريلليون تەڭگە بولاتىن 128 جوبا ەنگىزىلدى. ولاردىڭ اياسىندا 10،6 مىڭ جۇمىس ورنى اشىلادى. اتاپ ايتقاندا، تاۋ-كەن بايىتۋ كومبيناتى، «قازاقستان – جۇڭگو حالىقارالىق ونەركاسىپ قالاسى» يندۋستريالدى پاركى، جەل ەلەكتر ستانسالارىنىڭ زاۋىتى، حالىقارالىق اۋەجاي سالىنادى.
مەملەكەت باسشىسىنا اگروونەركاسىپ كەشەنىنىڭ دامۋى تۋرالى مالىمەت بەرىلدى. بيىل وبلىستا 540 مىڭ توننا قىزىلشا جيناۋ جانە 78 مىڭ توننا قانت ءوندىرۋ جوسپارلانىپ وتىر.
پرەزيدەنتكە ءوڭىردىڭ كولىك-لوگيستيكالىق جانە ترانزيتتىك الەۋەتىنىڭ جاي-كۇيى، ينفراقۇرىلىمدىق جوبالاردى ىسكە اسىرۋ، ەلدى مەكەندەردى گازبەن قامتاماسىز ەتۋ، سونداي-اق الەۋمەتتىك ينفراقۇرىلىمداردى سالۋ جانە جوندەۋدەن وتكىزۋ تۋرالى باياندالدى.
كەزدەسۋدە تۋريستىك سالاعا باسا نازار اۋدارىلدى. بەيبىت يسابايەۆتىڭ ايتۋىنشا، الاكولدىڭ جاعاسىنداعى ينفراقۇرىلىمدى جاڭعىرتۋ جۇمىستارى جالعاسىپ جاتىر. ءۇشارال اۋەجايىنىڭ ۇشۋ-قونۋ جولاعى جوندەۋدەن وتكەن.
وڭىردە كارىز جانە ەلەكتر جەلىلەرىن جاڭارتۋ جۇمىستارى جالعاسۋدا. بۇدان بولەك، «بالقاش» تۋريستىك-رەكرەاسيالىق ايماعىنىڭ باس جوسپارى ازىرلەندى. لەپسى اۋىلى – بالقاش كولى جاعالاۋى اۆتوجولى رەكونسترۋكسيادان ءوتىپ، ينجەنەرلىك ينفراقۇرىلىم سالۋ جوباسى ىسكە اسىرىلىپ جاتىر. جىل سوڭىنا دەيىن الماتى – وسكەمەن – لەپسى – اقتوعاي اۆتوجولىنىڭ قۇرىلىسى اياقتالادى.
قاسىم-جومارت توقايەۆ قانت ءوندىرىسىن ودان ءارى دامىتۋدىڭ، تۇرعىنداردى كوگىلدىر وتىنمەن قامتاماسىز ەتۋدىڭ، تۋريستىك ينفراقۇرىلىمدى جەتىلدىرۋدىڭ جانە دەمالۋشىلارعا قولايلى جاعداي جاساۋدىڭ ماڭىزىنا توقتالدى. تۇرعىن ۇي-كوممۋنالدىق شارۋاشىلىق جانە الەۋمەتتىك سالا نىساندارىنىڭ الداعى جىلىتۋ ماۋسىمىنا دايىندىعىن باقىلاۋدا ۇستاۋدى تاپسىردى.
