Ál-Farabı atyndaǵy QazUÝ-dyń tarıh fakúltetinde erekshe kún ótti. Oqýda joǵary nátıjege jetken 39 túlekke úzdik dıplom tabystaldy,- dep habarlaıdy Dalanews.kz
Saltanatty sharanyń ashylýynda QazUÝ-dyń turaqty áleýmettik damý jónindegi prorektory m.a. Juldyz Esimova QazUÝ-dyń Basqarma Tóraǵasy-Rektory Janseıit Túımebaevtyń atynan quttyqtaý hatyn oqydy.
Osydan keıin tarıh fakúltetiniń dekany, tarıh ǵylymdarynyń doktory Dosbol Baıqonaqov quttyqtaý sóz sóılep, zertteý jumystaryna atsalysqan jáne úzdik nátıjeler kórsetken túlekterge alǵys bildirdi. Dekan olarǵa sáttilik pen kásibı jetistikter tiledi.
Stýdent jastar atynan 2024-2025 oqý jylynyń stýdenttik dekany, «Mýzeı isi jáne eskertkishterdi qorǵaý» bilim berý baǵdarlamasynyń túlegi Nazerke Berikqyzy sóz sóıledi.
Ata-analar atynan fakúltet túlegi Maral Adılettiń anasy Uldaı Japparova sóz alyp, barlyq oqytýshylar men ýnıversıtet basshylyǵyna adal eńbegi men jastarǵa bergen bilimderi úshin alǵysyn jetkizdi.
Osydan keıin sahnaǵa tarıh ǵylymdarynyń doktory, profesor Rysgeldy Myrzabekov jáne belgili profesor Qalysh Amanjol shyǵyp, jas mamandarǵa «Arheologıa», «Etnologıa jáne antropologıa», «Mýzeı isi jáne eskertkishterdi qorǵaý» bilim berý baǵdarlamalary boıynsha dıplomdar tabys etti.
Shara barysynda «Arheologıa, etnologıa jáne mýzeıtaný» kafedrasynyń meńgerýshisi Rınat Jumataev stýdentterdiń belsendi qatysýyna erekshe alǵys bildirip, fakúltettiń qoǵamdyq, mádenı jáne sporttyq ómirine qosqan úlesin atap ótti. Alǵys hattar 10 túlekke tabystaldy.
Jalpy fakúltet boıynsha120 túlekke dıplom tabystaldy. Onyń ishinde 71 - bakalavr, 49 - magıstrat, 17 - doktorant. Olardyń arasynda sheteldik stýdentter Ózbekstannan bir bakalavr, Reseı Federasıasynan bir magıstrant jáne Tanzanıadan bir doktorant bar.
