Almatydaǵy Ál-Farabi dańǵylynda adam ólimine ákelgen jol apaty boiynsha jábirlenýshi tarap kúdikti Aleksandr Pakpen tatýlasqanyn málimdep, sottan oǵan bas bostandyǵynan aiyrmaityn jaza taǵaiyndaýdy surady, dep habarlaidy dalanews.kz.
Marqum júrgizýshi Elaman Qaiyrjanovtyń týystarynyń aitýynsha, qaiǵyly oqiǵaǵa qaramastan, olar kúdiktimen ózara kelisimge kelgen.
Jábirlenýshi taraptyń sózinshe, Aleksandr Pak kinásin tolyq moiyndap, jasaǵan isine ókinish bildirip, marqumnyń jaqyndarynan keshirim suraǵan.
Sondai-aq kúdikti materialdyq shyǵyn men moraldyq ótemaqyny tolyq ótegen. Bul derekti marqumnyń týystary da rastady.
«Bizde Aleksandr Pakqa qatysty materialdyq ta, moraldyq ta eshqandai shaǵym joq. Bolashaqta da bolmaidy. Tatýlasý eshqandai qysymsyz, óz erkimizben boldy. Onyń quqyqtyq saldary bizge túsindirildi jáne biz ony tolyq túsinemiz», – dedi marqumnyń týysy.
Marqumnyń jaqyndary Elaman Qaiyrjanovtyń ólimine bailanysty Aleksandr Pakty tolyq keshirgenderin aityp, oǵan bas bostandyǵynan aiyrýmen bailanysty emes jaza qoldanýdy surady.
«Bizdiń oiymyzsha, oǵan shartty jaza taǵaiyndaý jetkilikti. Qazirgi ýaqytta da, bolashaqta da oǵan eshqandai talabymyz bolmaidy», – dep málimdedi jábirlenýshi tarap.
Sot otyrysynda taǵy bir jábirlenýshi Qumr Teńelbaevanyń týystary da Aleksandr Pakty keshirgenderin aityp, oǵan shartty jaza taǵaiyndaýdy surady.
