Shymkent qalasy ákimdigi Turǵyn úi-kommýnaldyq sharýashylyq salasynda qyzmet kórsetetin "Turǵyn úi Shymkent" JShS-niń qyzmeti men qala ákiminiń orynbasaryna jasalǵan shabýyl arasynda qandai da bir bailanystyń bar-joǵyn áli de anyqtai almai otyr, dep habarlaidy Dalanews.kz.
Alaida prokýratýra, Qarjylyq monitoring agenttigi jáne Shymkent qalasynyń ishki memlekettik aýdit departamenti bul seriktestiktiń qyzmetin tekserýdi josparlap otyrǵan joq. Bul týraly atalǵan mekemeler Informburo.kz redaktsiiasynyń resmi suraýyna bergen jaýaptarynda habarlaǵan.
Eske salaiyq, 21 sáýir kúni Shymkent qalasy ákimdigi ǵimaratynyń aldynda qala ákiminiń orynbasary Rýslan Berdenovke oq atyldy. Qylmysqa kúdikti retinde “Turǵyn úi Shymkent” JShS direktory Ernar Jiembai tanylyp, oqiǵadan keiin ol qyzmetinen shettetildi. Atalǵan seriktestik Shymkent qalalyq qurylys basqarmasyna qarasty mekeme sanalady. Negizgi qyzmet baǵyty – kópqabatty turǵyn úilerge kúrdeli jóndeý júrgizý, liftilerdi jańartý jáne turǵyn úi-kommýnaldyq sharýashylyqty modernizatsiialaý.
Shymkent qalasynyń ishki saiasat basqarmasy oqiǵadan keiin ishki memlekettik aýdit departamentine hat joldaitynyn, onda kompaniia nysandaryn sapa, jobalyq-smetalyq qujattamaǵa sáikestik, sondai-aq biýdjet qarajatynyń tiimdi ári maqsatty jumsalýyboiynsha tekserýdi suraitynyn habarlaǵan. Alaida departament bul ótinishti qanaǵattandyrmaǵan.
“Ishki memlekettik aýdit departamenti tekseris júrgizýge negiz joq ekenin habarlady. Qazirgi ýaqytta tekserý josparly túrde jyl qorytyndysy boiynsha ǵana ótkiziledi. Aita ketsek, ótken jyly 2023–2024 jyldar aralyǵyn qamtityn aýdit júrgizilgen”, – delingen ishki saiasat basqarmasynyń túsiniktemesinde.
Ákimdiktiń málimdeýinshe, “Turǵyn úi Shymkent” JShS-men jóndelgen kópqabatty turǵyn úiler jumysty qabyldaý satysynda tekseriledi. Bul qabyldaýdy turǵyndardyń ózderi – negizgi tapsyrys berýshiler – júzege asyrady. Jumystyń sapasy avtorlyq jáne tehnikalyq qadaǵalaý tarapynan da baqylanady. Eger kemshilikter anyqtalsa, atalǵan taraptar jumysty qabyldaý aktisine qol qoimaidy. Sonymen birge ár nysanǵa kepildik merzimiqarastyrylǵan, sol ýaqyt aralyǵynda merdiger kompaniia barlyq aqaýlardy joiýǵa mindetti.
“Qazirgi ýaqytta ákimdikte “Turǵyn úi Shymkent” kompaniiasynyń qyzmeti men Rýslan Berdenovke jasalǵan shabýyl arasynda qandai da bir bailanystyń bar nemese joq ekeni jaily naqty málimet joq”, – dep habarlady ishki saiasat basqarmasy Informburo.kz agenttigine.
Shymkent qalasynyń prokýratýrasy da bul seriktestikti tekserýdi josparlap otyrǵan joq.
“Turǵyn úi Shymkent” JShS tarapynan bólingen biýdjet qarajatynyń igerilý tiimdiligi nemese jóndelgen kópqabatty úilerge qatysty qandai da bir tekserý josparlanbaǵan”, – delingen olardyń resmi jaýabynda.
Qarjylyq monitoring agenttigi de Berdenovke shabýyl men kompaniia qyzmeti arasyndaǵy bailanysty tekserip jatqan joq.
“Qazirgi ýaqytta agenttik “Turǵyn úi Shymkent” JShS-ne qatysty eshqandai tekserý júrgizip jatqan joq jáne atalǵan kompaniia qyzmeti men qala ákiminiń orynbasaryna shabýyl arasyndaǵy bailanysty rastaityn derekterge ie emes”, – delingen agenttik málimdemesinde.
