"Ákimderdiń dushpany" halyqtan kómek surady
El arasynda "ákimderdiń dushpany" dep atalyp ketken Niiazov osydan bir kún buryn Youtube arnasynda videoúndeýin jariialaǵan bolatyn.
Jańa jyl merekesi qarsańynda Ashat Niiazovtyń «Obojaiý» atty jobasynyń áleýmettik jelileri kibershabýylǵa ushyraǵan. Sonymen qatar, onyń aitýynsha, jarnama berýshiler Ashatpen jumys isteýden jappai bas tarta bastaǵan.
Osyǵan bailanysty jýrnalist qarjylai qoldaý kórsetýdi surady. Bul rette ol tek qazaqstandyqtardan kómek kútetinin basa aitty.
«Kóbiniń bizge basqa elderden qoldaý kórsetkisi keletinin bilemin, biraq biz ózimizdi qorǵaý úshin muny jasamaimyz. Muny bireýler óz maqsatyna paidalanyp, "Niiazov syrttan qarjy alatyn shetel tyńshysy" dep aitpaýy ábden múmkin», - deidi bloger.
Sondai-aq, ol túsken qaiyrymdylyqty kontent óndirýge ǵana emes, ózine jáne otbasyna jumsaýdy josparlap otyrǵanyn eskertti.
"Jýrnalistika men sóz bostandyǵyna qarsy birdeńeni qozdyryp júrgenderdiń barlyǵyna shyn júrekten "qurmetimdi" bildirgim keledi. Bizdiń barlyq áleýmettik jelilerimizdi buǵattasańyz da, Youtube arnasyn jaýyp tastasańyz da, biz báribir kontent túsirip, fleshkaǵa, diskige jazyp, kóshege shyǵyp, adamdarǵa taratamyz. Sizder bizdi toqtata almaisyzdar! – deidi Ashat Niiazov.
https://youtu.be/adKDFTgYN2M
