– Balqan elderiniń mamandary da negizinen bizdiń eldiń naryǵyna beiimdelip aldy dei almaimyn, alaida, belgili bir bóligi, osynda kelip, aqsha tabýdy kózdep otyr. Biz shet eldiń fýtbolynyń damýyna investitsiia salyp otyrmyz. Bizdiń qarjyǵa Serbiiada, Makedoniiada, Chernogoriiada, Nigeriiada, Ýganda elderinde fýtbol alańdary salynyp jatyr. Al ózimizde áli eshteńe ózgergen joq, – deidi Qazaqstan fýtbol federatsiiasynyń prezidenti Erlan Qojaǵapanov.
Fýtboldyń taýsylmaityn taýqymetin talqylaý maqsatynda sport ardagerleri, fýnktsionerler, aimaqtardaǵy jankúierler, qoǵam qairatkerleri men májilis depýtattary astanada bas qosty. Jiynǵa qatysýshylar № 1 sportty damytýdyń 2026 jylǵa deiingi strategiiasyn talqylady.
QFF basshysynyń aitýynsha, 2014 jyly elimizdegi kásipqoi fýtbol komandalaryn ustap turý úshin qazynadan 200 million dollarǵa jýyq qarjy jumsalǵan.
– 2004 jyldan beri qarai osy maqsatta shamamen 1 milliard eýro jumsaldy. Bul qarajatqa «Astana arenadai» eki stadion nemese 16 shaǵyn jabyq fýtbol arenalaryn, 615 fýtbol alańqailaryn salýǵa bolady. Jáne osylardyń bárin 10 jyl boiy 5 myń jattyqtyrýshysymen ustap turýǵa bolatyn edi. Osy ýaqyt aralyǵynda 4 fýtbol akademiiasyn qurýǵa bolatyn edi. Eń bastysy 400 myń bala fýtbol sportymen turaqty túrde ainalysýǵa múmkindik alatyn edi, – deidi Erlan Qojaǵapanov.
QFF basshysy fýtboldy «milliondardyń oiynyna» ainaldyryp, ony álemdik deńgeige kótere alǵan Islandiia men Germaniiany mysalǵa keltirdi.
QFF prezidenti fýtboldy damytýǵa ákimderdiń qol bailaý bolatynyn jasyrmady.
«Ákimderdi fýtbol alańynan alastaý kerek, sebebi olar stadionda negizsiz dúrbeleń týdyrady. Bizdiń tóreshiler quramynda da jetisip turǵan eshteńe joq. Máselen, ákim aýyssa, klýb jetekshileri oibaiǵa basady: «ákim kele jatyr! Qansha tólesek te, jeńilmeýge tyrysaiyq» dep jantalasady. Eger de biz fýtboldy damytqymyz kelse, aýladan bastaiyq. Óz aýlamyzda alańdar quryp, jattyqtyrýshyǵa 30 myń teńgesin tólep, shyndap ainalysaiyq – deidi E.Qojaǵapanov.
