Qazaqstan zańnamasynda azamattardy qabyldaý kezinde memlekettik qyzmetkerdi fotoǵa nemese videoǵa túsirýge tikelei tyiym salynbaǵan. Bul týraly Jetisý oblysy prokýratýrasynyń memlekettik aiyptaýdy qoldaý jáne apelliatsiialyq satyǵa qatysý basqarmasynyń prokýrory Dana Sársenbai málimdedi, dep habarlaidy dalanews.kz.
Onyń aitýynsha, azamattar ákimdikterde, basqarmalarda nemese memlekettik mekemelerde qabyldaý barysynda foto jáne beinetúsirilim júrgize alady. Alaida mundai áreket qabyldaý protsesine kedergi keltirmeýi jáne ózge azamattardyń quqyqtaryn buzbaýy tiis.
– Qazaqstan Respýblikasynyń zańnamasynda azamattardy qabyldaý kezinde laýazymdy tulǵany fotoǵa nemese videoǵa túsirýge tikelei tyiym salynbaǵan. Degenmen túsirilim qabyldaýdyń qalypty ótýine kedergi jasamaýy, basqa adamdardyń quqyqtaryn, sondai-aq derbes derekterdi qorǵaý týraly zańnama talaptaryn buzbaýy qajet, – dedi Dana Sársenbai.
Sondai-aq prokýror laýazymdy tulǵanyń beinesin paidalaný men taratý kezinde Qazaqstan Respýblikasy Azamattyq kodeksiniń 145-babynyń talaptary eskeriletinin atap ótti.
Mamandardyń aitýynsha, foto nemese beinematerialdardy jariialaý barysynda onda kórinis tapqan adamdardyń quqyqtary men zańdy múddelerin saqtaý mańyzdy.
Osyǵan bailanysty azamattarǵa túsirilim júrgizgen kezde qoldanystaǵy zańnama talaptaryn saqtap, ózge tulǵalardyń jeke derekterine qatysty jaýapkershilikti eskerýge keńes beriledi.
