Eń aldymen aýdan basshysy Dostyq aýyldyq okrýgine qarasty 6 eldi mekendi jáne ondaǵy memlekettik mekemeler men kásipkerlik nysandardy aralap kórip, turǵyndar tarapynan aitylǵan ózekti máselelerdi tyńdady.
Dostyq – Maqtaaral aýdanyndaǵy halqy eń kóp jáne eń kóp ultty aýyldyq okrýg sanalady. 11283 gektar jerde 16 myńnan asa turǵyn tatý-tátti ǵumyr keshýde.
Okrýgte barlyǵy 5 mektep, 8 balabaqsha, 5 densaýlyq saqtaý mekemesi, 3 pochta qyzmeti, 1 mádeniet úii, 2 kitaphana, 11 saýda núkteleri halyqqa qyzmet kórsetýde.
Dostyq turǵyndary tarapynan negizinen eldi mekenderdi tabiǵi gazben qamtamasyz etý jáne ishki kóshelerge asfalt tóseý máselesi kóterildi. Sondai-aq, birneshe jyldan beri sheshimin tappai kele jatqan K-19 kanalynyń basyna sý sorǵysh ornatyp berýdi eńbekshi diqandar ótindi.
A.Qalybekov okrýginde barlyǵy 4 mektep, 6 balabaqsha, 11 saýda núkteleri, 2 maqta tútý tsehy, 1 SVA, 4 FAP, 1 klýb, 1 kitaphana, 1 pochta bólimshesi turǵyndarǵa qyzmet etýde.
Okrýgke gaz joldary tartylyp kelgenimen turǵyndar kógildir otynnyń rahatyn kóre almai otyr. Bul máselemen jaqsy tanys ekenin jáne ony sheshý úshin máselemen turaqty ainalysyp kele jatqanyn aitqan aýdan ákimi B.Asanov aldaǵy qarasha aiyna deiin gazdyń beriletinin atap ótti. Sondai-aq, keibir eldi mekenderdegi elektr baǵanalaryn, transformatorlardy jańartý máselesin de aýyl turǵyndary kóterdi.
Maqtaaral aýdany ákiminiń baspasóz qyzmeti
