QR Prezıdenti Qasym-Jomart Toqaev birinshi kezektegi mindetterdiń biri retinde ulttyq kompanıalardy IPO-ǵa shyǵarý jumysyn atap ótti.
2022 jylǵy 27 maýsymda ótken «Astana» halyqaralyq qarjy ortalyǵyn basqarý jónindegi keńestiń otyrys barysynda «Elimizdiń qarapaıym azamattary Ulttyq kompanıalardyń aksıalaryn ıelenýge jáne salymdarynan óz dıvıdentterin alýǵa múmkindigi bolýǵa tıis. Dál osyndaı jolmen halyqtyń ınvestısıalyq mádenıeti qalyptasady. IPO-ǵa qatysý Qazaqstannyń barlyq turǵyny úshin qoljetimdi bolýy qajet. Ol úshin qaǵazbastylyq pen búrokratıany boldyrmaıtyn jańa sıfrlyq sheshimder kerek», –dep atap ótti memleket basshysy.
Samuryq-Qazyna» AQ Basqarma tóraǵasy Almasadam Sátqalıev bylaı dep habarlady:
«Halyqty barynsha tartý maqsatynda, biz Qazposhtanyń, bırjalardyń jáne brokerlerdiń sıfrlyq ınfraqurylymyn paıdalanýdy josparlap otyrmyz. Mysal úshin, aksıalardy úıden shyqpaı-aq mobıldi qosymshalardy paıdalana otyryp, satyp alýǵa bolady, al shalǵaı óńirler úshin – Qazposhta bólimsheleriniń qyzmetteri paıdalanylady».
AİH basqarmasynyń tóraǵasy Renat Bekturov bylaı dep málimdedi:
«Biz Qazaqstan azamattary aldaǵy IPO-ǵa qatysýdyń eń qarapaıym jáne túsinikti ádisine ıe bolýy tıis dep sanaımyz. Aksıalardy jarıa ornalastyrýdy múmkindiginshe qoljetimdi bolatyndaı jáne ınvestorlardy satyp alýǵa jáne satýǵa ǵana emes, sonymen qatar aksıalardy óz portfelderinde uzaq ýaqyt ustaýǵa yntalandyratyndaı etip qurylymdaý óte mańyzdy. AIX buǵan ınovasıalyq sheshimder men bizdiń saýda alańymyzdyń múmkindikteriniń kómegimen járdemdesýge daıyn».
Tikeleı jazylý – aksıalardy bastapqy ornalastyrý kezinde deldalsyz (broker nemese anderaıter) tikeleı emıtentten satyp alý týraly shart jasasý. Tikeleı jazylý bólshek jáne ınstıtýsıonaldyq ınvestorlardan brokerler nemese anderaıterler (býkbıldıng) arqyly tapsyrystardy jınaýdyń ádettegi ádisimen qatar júrgizilýi múmkin.
Tikeleı jazylym barlyq qazaqstandyqtar úshin Tabys mobıldi qosymshasy jáne/nemese Qazaqstannyń barlyq óńirlerindegi «Qazposhta» bólimsheleri arqyly qoljetimdi bolady.
IPO-ǵa tikeleı jazylýdy Tabys arqyly resimdeý úshin ınvestordyń jeke kýáligi, bank kartasy jáne ınternetke qoljetimdiligi bar smartfony bolýy qajet. Qyzmet táýlik boıy onlaın rejımde qoljetimdi.
Taǵy bir nusqa – «Qazposhtanyń» jaqyn jerdegi bólimshesine baryp (Qazaqstan boıynsha 721), tikeleı jazylýdy resimdeý jáne qajet bolǵan jaǵdaıda, jazylymǵa qatysýdy tirkeý boıynsha keńes alý úshin operatorǵa ótinish jasaý.
Serik Saýdabaev, "Qazposhta" AQ Basqarma tóraǵasy:
"Biz bul prosestiń bir bóligi bolǵanymyzǵa qýanyshtymyz. Qazaqstandyqtardyń IPO-ǵa qol jetkizýine yqpal etemiz. Jazylý "Qazposhtanyń" búkil eldegi 721 bólimshesinde qoljetimdi bolady. Ári osy qyzmetpen elimizdiń barlyq oblysyn qamtýǵa múmkindik beredi. Bizdiń operatorlar klıentterge kómek kórsetýge jáne olardyń suraqtaryna jaýap berýge daıyn".
Alda ótkeli otyrǵan IPO-ǵa kez kelgen brokerler (AIX saýda músheleri) arqyly dástúrli tásilmen de qatysýǵa bolady.
Aldaǵy IPO boıynsha tikeleı jazylý úshin AIX platformasy IPO parametrleri resmı jarıalanǵannan keıin Tabys qosymshasynda jáne 721 Qazposhta bólimshelerinde qoljetimdi bolady.
Tabys mobıldi qosymshasy 2020 jyldyń jeltoqsan aıynda AIX qoldaýymen bilim berý maqsatynda iske qosylǵan, ol bólshek saýda ınvestorlaryna kirý shegi tómen kapıtal naryqtarynda ınvestısıalaýdyń qarapaıym quralyn usynady. Búgingi tańda Tabys qosymshasynda 25 myń ınvestor shoty ashylǵan. Ony AppStore-dan jáne Google Play-den júktep alýǵa bolady.
