Almatyda iz-tússiz joǵalǵan 25 jastaǵy Erzat Eginbaidyń ólimine qatysty tergeý bastaldy. Jigit jumysynan nebári 15 minýtqa suranyp shyǵyp, arada tórt kún ótkende sý qoimasynan óli tabylǵan, dep habarlaidy dalanews.kz almaty.tv-ǵa siltep.
Erzat 19 mamyrda ádettegidei jumysqa barǵan. Ol Almatyda geodezistiń kómekshisi bolyp eńbek etken. Sol kúni túste bastyǵynan "dúkenge baryp kelemin" dep suranyp shyqqanymen, qaita oralmaǵan. Keshke jumys ornyndaǵylar onyń jinalysqa kelmegenin baiqap, jubaiyna habarlasqan.
Týystarynyń aitýynsha, sol sátten bastap otbasy óz kúshimen izdeý jumystaryn bastaǵan. Olar beinebaqylaý kameralaryn qarap, Erzattyń sońǵy júrgen baǵyttaryn anyqtaýǵa tyrysqan.
Marqumnyń anasy Talsha Qusaiynovanyń sózinshe, uly eshqandai kúmándi ortada bolmaǵan, qumar oiyn oinamaǵan jáne kún saiyn jumystan keiin otbasyna habarlasyp otyrǵan.
Keiin Erzat Almaty oblysy Eńbekshiqazaq aýdanyna qarai ketkeni belgili bolǵan. Beinejazbalarda onyń áldekimdi izdegendei jan-jaǵyna alańdap qarap júrgeni baiqalǵan. Ol Kosmos aýylyndaǵy aialdamadan túsip qalǵan, sodan keiingi júrgen baǵyty anyqtalmaǵan.
23 mamyrda Erzattyń súiegi Kosmos aýyly mańyndaǵy sý qoimasynan tabylǵan. Ony balyqshylar baiqap qalǵan.
Marqumnyń týystary onyń ólimine qatysty kúmán kóp ekenin aitady. Olardyń sózinshe, marqumnyń denesinde tunshyqtyrýǵa uqsas izder bolǵan. Alaida aldyn ala málimet boiynsha politsiia súiekten zorlyq-zombylyq belgileri anyqtalmaǵanyn habarlaǵan.
Almaty Politsiia departamentiniń resmi ókili Saltanat Ázirbektiń aitýynsha, qazir oqiǵanyń barlyq mán-jaiyn anyqtaýǵa baǵyttalǵan sotqa deiingi tergeý júrgizilip jatyr.
Jaqyndarynyń sózinshe, Erzat jýyrda ǵana áke bolatynyn bilgen. Jarty jyl buryn shańyraq kótergen jigittiń qazasy otbasy úshin aýyr soqqy bolǵan. Týystary istiń ádil ári ashyq tergelýin talap etip otyr.
